Մեծ թատրոնը կսկսի բացահայտել «անհավատարիմ» աշխատակիցներին, ովքեր «քաղաքական հայացքներ» ունեն․ «Սիստեմա»-ի բացահայտումը

Ռուսական Մեծ թատրոնի ղեկավարությունը պայմանագիր է կնքել աշխատակիցներին լրտեսելու ծրագրային ապահովում տեղադրելու համար։ «Սիստեմա» հետաքննական նախագիծը պարզել է, որ խոսքը InfoWatch Traffic Monitor ծրագրի մասին է, որը նախատեսվում է տեղադրել 500 աշխատանքային սարքերի վրա։ Պայմանագրի արժեքը 21,6 միլիոն ռուբլի է (266 հազար դոլար)։

Ծրագիրը կհետևի աշխատանքային ժամերին, ինչպես նաև աշխատակիցների վարքագծին (նրանք տեխնիկական բնութագրերում կոչվում են «վերահսկվող անձինք»)։ Յուրաքանչյուր աշխատակցի համար կկազմվեն հատուկ քարտեր, որոնցում կնշվեն «գործողություններում անոմալիաները»։

Պարզելու համար՝ արդյո՞ք աշխատակիցը «ռիսկի խմբում» է, ծրագիրը կուսումնասիրի՝ աշխատակիցը նամակագրության մեջ օգտագործե՞լ է անպարկեշտ բառապաշար, քննարկե՞լ է ղեկավարությանը և արդյո՞ք պատրաստվել է աշխատանքից ազատման։ Ծրագրային ապահովման մշակողները «անոմալ» վարքագծի մեջ ներառում են նաև «հատուկ ռազմական գործողության» (ՌԴ-ում այսպես են անվանում Ուկրաինայի դեմ սանձազերծած պատերազմը) նկատմամբ հետաքրքրությունը և «քաղաքական հայացքների» առկայությունը (չի նշվում, թե ինչ հայացքների մասին է խոսքը)։

Աշխատակցի քարտ-թղթապանակում «անոմալիաների» առկայությունը կազդի նրա վարկանիշի վրա։

Ըստ ծրագրի՝ արհեստական ​​բանականությունը կբացահայտի «անոմալիաները»՝ հիմնվելով որսացած տվյալների վրա։ Դրա համար կստեղծվեն սոցիալական ցանցերում և մեսենջերներում (WhatsApp, Viber, Telegram), ինչպես նաև բոլոր հայտնի բրաուզերներում աշխատակցի ցանկացած ակտիվության «ստվերային պատճեններ»։ Բացի այդ, ծրագիրը պետք է որսա օգտատիրոջ կողմից մուտքագրված տեքստը։

Անվտանգության ծառայության աշխատակիցները կվերլուծեն այս տվյալներն իրական ժամանակում։

Պայմանագրի կատարողը «Անդեկ» բաժնետիրական ընկերությունն է, իսկ ծրագիրը մշակվել է InfoWatch լաբորատորիայի կողմից։ Վերջինն իր համակարգերը վաճառում է խոշորագույն ռուսական բանկերին, զենք արտադրող «Ռոստեխ»-ին և ՌԴ Պաշտպանության նախարարությանը։