Թերություններ՝ Աշոցք – Բավրա ավտոճանապարհի հիմնանորոգված հատվածում. նախարարը հանձնարարել է տեղադրել նոր ասֆալտաշերտ

ՀՀ ՏԿԵ նախարար Դավիթ Խուդաթյանն այսօր աշխատանքային այցով Շիրակի մարզում էր։ Այս մասին տեղեկացնում են ՏԿԵ նախարարությունից՝ նշելով, որ որոշ ճանապարհներին եղել են թերություններ, նախարարը հանձնարարել է վերացնել անորակ աշխատանքը։

ՏԿԵ փոխնախարար Վարդան Կոստանյանի, մարզպետ Դավիթ Առուշանյանի, «Ճանապարհային դեպարտամենտ» հիմնադրամի գործադիր տնօրեն Արկադի Չերչինյանի, մարզի համայնքապետերի հետ դիտարկվել են մարզի տարբեր համայնքներում Տարածքային կառավարման և ենթակառուցվածքների նախարարության համակարգման ներքո իրականացվող ծրագրերի ընթացքը:

Նախարարը նախ ծանոթացել է Անի համայնքի Հայկաձոր բնակավայր տանող ճանապարհի 1.5 կմ երկարությամբ հատվածի՝ սուբվենցիոն ծրագրով իրականացվող ասֆալտապատման աշխատանքների ընթացքին:

Այնուհետև դիտարկվել է Զարինջա–Շիրակի մարզի սահման 2.5 կմ և Տ-7-20, Ձիթհանքով-Արագածոտնի մարզի սահման-1.8 կմ երկարությամբ ճանապարհի՝ Շիրակի մարզով անցնող հատվածի հիմնանորոգման աշխատանքները։

499 մլն դրամ պայմանագրային արժեքով ծրագրի շինարարությունը մեկնարկել է 2025 թվականին։
Սուբվենցիոն ծրագրով հիմնանորոգվում է Անի համայնքի Մարալիկ քաղաքի Հր. Շահինյան փողոցի՝ 1 կմ երկարությամբ ճանապարհահատվածը, որի աշխատանքները գտնվում են ակտիվ ընթացքի մեջ:

Նախարարը եղել է նաև Արթիկ համայնքում, որտեղ մի քանի փողոցներում իրականացվում են ասֆալտապատման և բարեկարգման աշխատանքներ:
Նոր Կյանք բնակավայրում այցելել է «LEAD4Shirak» ծրագրի շրջանակներում, ԵՄ համաֆինանսավորմամբ կառուցված վարդերի ջերմատուն։
Գյումրիում դիտարկվել են մի շարք փողոցների հիմնանորոգման աշխատանքները:

Որոշակի խնդիրներով պայմանավորված՝ նախարարը հանձնարարել է վերացնել առկա թերությունները և ասֆալտապատման աշխատանքներն իրականացնել միչև ցուրտ եղանակի սկսվելը:

Թերություններ էին առկա նաև Աշոցք – Բավրա ավտոճանապարհի հիմնանորոգված հատվածում:
Խուդաթյանը շինարարին հանձնարարել է ամբողջովին վերացնել անորակ աշխատանքը, տեղադրել նոր ասֆալտաշերտ, այլապես կառավարությունը նշված ճանապարհի մասով ֆինանսավորում չի իրականացնի։

Նախարարը շինարարական բոլոր օբյեկտներում հստակ ընդգծել է՝ անորակ աշխատանքը չի ընդունվելու և չի վճարվելու, բոլոր ճանապարհների հիմնական բաղադրիչները ստուգվելու են պետական լաբորատորիայում։
Շիրակի մարզ այցի ընթացքում Խուդաթյանը պատասխանել է նաև մարզային լրատվամիջոցների լրագրողների հարցերին։