Եթե Ջալալ Հարությունյանն իմացել է՝ եղել է հանցագործություն, ինչո՞ւ գործողություն չի կատարել․ պաշտպան․ ՏԵՍԱՆՅՈՒԹ

Երևանի քրեական դատարանում Ժորա Չիչոյանի նախագահությամբ քննվում է «Լելե Թեփե»-ի գործով դատական նիստը, որով մեղադրյալի աթոռին են պաշտպանության նախկին նախարար Սեյրան Օհանյանի որդին՝ գնդապետ Արթուր Օհանյանը, պաշտպանության բանակի զորամասերից մեկի մոտոհրաձգային գումարտակի հրամանատար Գեղամ Աբրահամյանն ու տանկային գումարտակի հրամանատար Գառնիկ Մնացականյանը։

Հիշեցնենք, որ Գեղամ Աբրահամյանին մեղադրանք է առաջադրվել այն բանի համար, որ նա, զբաղեցնելով ՀՀ ՊԲ թիվ զորամասի 2-րդ մոտոհրաձգային գումարտակի հրամանատարի պաշտոնը, կոչումով փոխգնդապետ, մոտոհրաձգային գումարտակի զինծառայողների ուղղակի պետը, 2020 թվականի սեպտեմբերի 27-ին ՀՀ կառավարության կողմից հայտարարված ռազմական դրության ժամանակ՝ 2020 թվականի հոկտեմբերի 7-ին, հրաժարվել է զինվորական ծառայության առանձին պարտականությունների կատարումից, որը զուգորդվել է դրանց փաստացի դադարեցմամբ։ Նույն մեղադրանքն է առաջադրված նաև տանկային գումարտակի հրամանատար Գառնիկ Մնացականյանին։ Իսկ Արթուր Օհանյանին մեղադրանք է առաջադրվել այն բանի համար, որ նա, 2019 թվականի նոյեմբերի 19-ից ՀՀ պաշտպանության նախարարի թիվ 2059-Ա հրամանով նշանակվելով ՀՀ ՊԲ թիվ զորամասի հրամանատար, կոչումով գնդապետ, կոչման և պաշտոնի բերումով հանդիսանալով նույն զորամասի ողջ անձնակազմի ուղղակի պետը, 2020 թվականի հոկտեմբերի 6-ից 7-ն, ընկած ժամանակահատվածում իր ծառայողական պարտականությունների կատարման նկատմամբ անփույթ վերաբերմունք է դրսևորել, որի հետևանքով դրանք կատարել է ոչ պատշաճ, որպիսի գործողություններն անզգուշությամբ առաջացրել են ծանր հետևանքներ։

Մեղադրյալները մեղադրանքը չեն ընդունում։