13.06.2026 | 00:58
ԱԱ-2026․ Կանադան խուսափեց պարտությունից Բոսնիա և Հերցեգովինայի դեմ խաղում․ ՏԵՍԱՆՅՈՒԹ
Օգոստոսի 2-ից Ադրբեջանի գազը Սիրիա կմատակարարվի
Քաղաքականություն
30.07.2025 | 14:48
Թուրքիայի էներգետիկայի նախարար Ալփարսլան Բայրաքթարը հայտարարել է, որ օգոստոսի 2-ին կսկսվի բնական գազի արտահանումը Ադրբեջանից Սիրիայի Հալեպ նահանգ՝ Թուրքիայի հարավ-արևելյան Քիլիս նահանգով, հաղորդում է Anadolu-ն։
Նա նաև նշել է, որ աշխատանքների ավարտից հետո Սիրիա կմատակարարվի մոտ 900 մեգավատ էլեկտրաէներգիա, որը կբավարարի 1,6 միլիոն տնային տնտեսությունների կարիքները։ Բայրաքթարը նաև հայտնել է, որ այս տարի Թուրքիայի տարբեր շրջաններում հայտնաբերվել է 57 միլիոն բարել նավթի պաշար։ Նա նշել է, որ Դիարբեքիրի շրջանում կա 4-6 միլիոն բարել թերթաքարային գազի և թերթաքարային նավթի գնահատված ներուժ։
Ըստ թուրք նախարարի՝ Սև ծովում հաջորդ տարի զարգացման երկրորդ փուլի ավարտից հետո հանված բնական գազը բավարար կլինի 8 միլիոն տնային տնտեսությունների կարիքները բավարարելու համար։
Հիշեցնենք՝ ավելի վաղ թուրքական աղբյուրները հայտնել էին, որ ադրբեջանական բնական գազը Թուրքիայի տարածքով կսկսվի Սիրիային մատակարարվել արդեն օգոստոսի 1-ից։
Առաջին փուլով նախատեսվում է տարեկան մատակարարել 1,2 միլիարդ խորանարդ մետր գազ: Վառելիքը հիմնականում կօգտագործվի Սիրիայի Հալեպ և Հոմս նահանգների էլեկտրակայաններում՝ էլեկտրաէներգիա արտադրելու համար։ Մատակարարումները կիրականացվեն թուրքական Քիլիս քաղաքից մինչև սիրիական սահման ձգվող խողովակաշարով։ Հաղորդվում է, որ թուրքական կողմն արդեն ավարտել է խողովակաշարի անցկացումը մինչև սահման, իսկ սիրիական կողմը՝ բոլոր տեխնիկական միացումները։
Թարգմանությունը՝ Էմմա Չոբանյանի
