Հայցային «պատերազմ». հերքումների ու միլիոնավոր դրամների փոխհատուցման պահանջների հետքերով․ ՏԵՍԱՆՅՈՒԹ

12 հայց՝ Սամվել Կարապետյանի, նույնքան հայց՝ Վազգեն Գալստանյանի, 3 հայց՝ Ռոբերտ Քոչարյանի կողմից՝ ընդդեմ իշխանության բարձրաստիճան ներկայացուցիչների և նրանց համակիրների․ վերջին մեկուկես ամսում տարբեր ճամբարներում գտնվող գործիչներն ակտիվորեն դատի են տալիս միմյանց։

Կալանքի տակ գտնվող Գալստանյանն ու Կարապետյանն այս հարցում առաջամարտիկներն են։ Ռուսաստանաբնակ գործարարը հուլիսի 3-ին ՔՊ-ական միանգամից երկու պատգամավորի՝ Արսեն Թորոսյանի և Հայկ Կոնջորյանի դեմ հայց ներկայացրեց։ Կարապետյանը Կոնջորյանի՝ ԱԺ ամբիոնից ելույթում տեղ գտած մի շարք արտահայտություններ է վիրավորանք և զրպարտություն որակում։ Արսեն Թորոսյանի դեմ հայցը ևս ԱԺ նիստում ելույթի համար է։ Որպես հայցի ապահովման միջոց՝ դատարանը 9 մլն դրամ կալանք է դրել վերջինի հաշիվների վրա։

Հենց այս երկու հայցերով սկսվեց հայցային «մենամարտն» ու միլիոնավոր դրամների փոխհատուցումների պահանջը. գրեթե ամենօրյա ռեժիմով զրպարտություն և վիրավորանք տարածելու մասով հերքման պահանջներ են մուտք արվում դատարան։

«Հանուն հավասար իրավունքների կենտրոն» ՀԿ ղեկավար Գայանե Աբրահամյանը նկատում է՝ դատավորները բավականին բարդ խնդիրների առաջ են կանգնելու։

Իսկ որտե՞ղ է ավարտվում քաղաքական կոշտ խոսքը և սկսվում վիրավորանքն ու զրպարտությունը․ այս հարցն այս օրերին բավական շատ է քննարկվում։

Իշխանությունների պատասխան հարվածը շատ չուշացավ․ առողջապահության նախարար Անահիտ Ավանեսյանը հայտարարեց՝ Բագրատ Գալստանյանին վերագրվող ձայնագրության մեջ հնչող արտահայտության համար խմբային հայց են պատրաստվում ներկայացնել։ ՔՊ-ական նախարարը պատճառաբանեց՝ վիրավորված է ձայնագրության մեջ հնչող «խորը անասուն» արտահայտությունից։

Միջազգային իրավունքի մասնագետ Արա Ղազարյանը, սակայն, խմբային սպասվող հայցի մասով խնդիրներ է մատնանշում։

Գյումրիի «Ասպարեզ» մամուլի ակումբի խորհրդի նախագահ Լևոն Բարսեղյանի կարծիքով՝ իշխանությունը հնարավորինս պետք է զերծ մնա դատարաններ դիմելուց։

Քաղհասարակության ներկայացուցիչ Գայանե Աբրահամյանը երկկողմանի հայցային այս գրոհում վտանգավոր տարրեր է մատնանշում։

Շուրջ երեք տասնյակի հասնող դատական հայցերն ավելանում են օր օրի։ Ինչպես դրանք կազդեն քաղաքական և հասարակական գործիչների խոսույթների վրա, այս պահին դժվար է ասել։ Դատելով սոցցանցերում կողմերի արձագանքներից՝ հայցային պատերազմները դեռ նոր են սկսվում։

Մանրամասները՝ տեսանյութում։

Ռոզա Վարդանյան