Բաքու-Նախիջևան երթուղու ավտոբուսի ուղևորները մեկ օրից ավելի մնացել են Իրանի սահմանին

Բաքու-Նախիջևան-Բաքու երթուղով՝ կանոնավոր երթուղով Իրանի տարածքով անցնող ավտոբուսների աշխատանքում զգալի ուշացումներ են եղել, ինչը դժգոհություն է առաջացրել ուղևորների շրջանում։ Ուղևորներն ադրբեջանական լրատվամիջոցներին հայտնել են, որ հուլիսի 19-ին ժամը 19:00-ին մեկնած ավտոբուսը Նախիջևան է ժամանել միայն հուլիսի 21-ին ժամը 03:00-ին։

Իրանի սահմանին մաքսային հսկողությունն անցնելիս մոտ 50 ուղևոր տեղափոխող ավտոբուսները (խոսքը երեք ավտոբուսի մասին է) կանգնեցվել են լրացուցիչ ստուգման համար։ Միջադեպը տեղի է ունեցել հուլիսի 19-ի երեկոյան։ Ադրբեջանական որոշ աղբյուրներ հայտնել են, որ Իրանի մաքսային ծառայության աշխատակիցները ձերբակալել են Բաքվից Իրանի տարածքով Նախիջևան ուղևորվողներին։ Նրանց ժամանակավորապես տեղավորել են գիշերելու անցակետի մոտ գտնվող մզկիթում՝ սահմանափակելով նրանց տեղաշարժը մեկ կիլոմետր շառավիղով։ Իրանի մաքսային ծառայության աշխատակիցները նրանց հրահանգել են չհեռանալ տարածքից։

Ուղևորները նաև պնդում են, թե իրենց վերադարձի տոմսերը չեղարկվել են, իսկ նորերի վաճառքը կասեցվել է ինչպես ավտոկայանում, այնպես էլ առցանց համակարգի միջոցով: Ուղևորներից մեկը, որը չի ցանկացել անունը հրապարակել, ասել է, որ իրենց ո՛չ սնունդ են տվել, ո՛չ ջուր։

«Եթե նրանք չէին պատրաստվում մեզ թողնել, ինչո՞ւ թույլ տվեցին անցնել մաքսատունը։ Հիմա մեզ այստեղ պահել են որպես գերիների։ Մենք չենք կարող ո՛չ վերադառնալ Բիլասուվար, ո՛չ էլ գնալ Ջուլֆայի մաքսատուն»,- նշել է նա։

Ադրբեջանական լրատվամիջոցներին երկրի Ցամաքային տրանսպորտի գործակալությունից հայտնել են, որ երթուղու ուշացումը պայմանավորված է եղել իրանական կողմի լրացուցիչ հարցումներով։ Բոլոր անհրաժեշտ տվյալներն անհապաղ փոխանցվել են, որից հետո ավտոբուսներին թույլատրվել է շարունակել ճանապարհը։

Գործակալությունը հիշեցրել է, որ Բաքու-Նախիջևան-Բաքու երթուղով ուղևորությունները, որն անցնում է Իրանի տարածքով, դադարեցվել էին 2025 թվականի հունիսի 14-ից՝ անվտանգության նկատառումներից ելնելով՝ տարածաշրջանում իրավիճակի սրման պատճառով: Ուղևորափոխադրումները վերսկսվել են հուլիսի 19-ին։

Թարգմանությունը՝ Էմմա Չոբանյանի