03.07.2026 | 22:52
Ուրախ ենք աջակցել Մեծ Բրիտանիա-Հայաստան ռազմավարական գործընկերության իրականացմանը. դեսպան
Պարտադիր զինվորական ծառայության ժամանակահատվածը կհաշվարկվի հանրային ծառայության ստաժ․ նոր նախագիծ
Հասարակություն
20.07.2025 | 11:52
Արդարադատության նախարարությունն առաջարկում է լրացումներ կատարել «Հանրային ծառայության մասին» օրենքում։
Օրենսդրական փոփոխությունների ընդունման դեպքում զորակոչի միջոցով իրականացվող շարքային կազմի պարտադիր զինվորական ծառայության ժամանակահատվածը կհաշվարկվի հանրային ծառայության ստաժ։
Նախագծի հեղինակների պնդմամբ՝ արդյունքում կբարձրանա զինծառայողների սոցիալական պաշտպանվածությունը, պարտադիր զինվորական ծառայությունը կընկալվի ոչ միայն որպես պարտականություն, այլև որպես սոցիալական երաշխիք և հետագա մասնագիտական կայացման հնարավորություն։
«Պարտադիր զինվորական ծառայության զորակոչի միջոցով իրականացվող շարքային կազմի պարտադիր զինվորական ծառայության ժամանակահատվածը որպես հանրային ստաժ հաշվարկելը կբարձրացնի ժամկետային զինծառայողների սոցիալական պաշտպանվածությունը և կհանդիսանա խթան զորակոչման ենթակա քաղաքացիների համար: Ավելին, առաջարկվող նախագիծը կնպաստի բարձրագույն ուսումնական հաստատություններում ուսումնառություն անցած կամ անցնող և բարձր իրավագիտակցություն ունեցող քաղաքացիների ներգրավմանը ՀՀ զինված ուժերում:
Նշված նպատակն ամրագրված է նաև ՀՀ կառավարության 2021-2026թթ. ծրագրով, որի համաձայն՝ Կառավարության ուշադրության կենտրոնում մշտապես եղել և լինելու է զինծառայողների և նրանց ընտանիքների սոցիալական պաշտպանության բարձրացումը, ուստի Կառավարությունը մեծացնելու է զինծառայողների նյութական և սոցիալական ապահովման երաշխիքները, կատարելագործելու է զինծառայության գրավչության և զինծառայողի հեղինակության բարձրացման մեխանիզմները։
Բացի այդ, հաշվի առնելով «Հանրային ծառայության մասին» օրենքի կարգավորման առարկա հանդիսացող հարաբերությունների, ինչպես նաև պարտադիր զինվորական ծառայության զորակոչի միջոցով իրականացվող շարքային կազմի պարտադիր զինվորական ծառայության առանձնահատկությունները՝ նախագծով առաջարկվում է պարտադիր զինվորական ծառայության զորակոչի միջոցով իրականացվող շարքային կազմի պարտադիր զինվորական ծառայությունը սահմանել ոչ թե հանրային ծառայություն, այլ նշված ծառայության ժամանակահատվածը հաշվարկել որպես հանրային ծառայության ստաժ»,-նշվում է նախագծի հիմնավորման մեջ:
