06.10.2026 | 17:00
Սեպտեմբերի վերջին մի շարք շրջաններում գրանցվել են պատմական առավելագույն ջերմաստիճաններ
Օջալանը տեսաուղերձում հայտարարել է, որ PKK-ն հրաժարվել է ազգային պետության ստեղծումից
Քաղաքականություն
09.07.2025 | 22:15
Քուրդիստանի աշխատավորական կուսակցության (PKK) առաջնորդ Աբդուլլահ Օջալանն այսօր նոր կոչ է արել «Խաղաղության և ժողովրդավարական հասարակության գործընթացի» շրջանակում։ Fırat գործակալության (ANF) կողմից հեռարձակված տեսաուղերձում Օջալանը պաշտպանել է քաղաքական և սոցիալական խաղաղությունը զինված մեթոդներից վեր դասող մոտեցումը։ Իմրալը բանտի մյուս բանտարկյալները նույնպես միացել են Օջալանի կոչին։
Թուրքական լրատվամիջոցները գրում են, որ 7 րոպե տևողությամբ տեսանյութում Համիլի Յըլդըրըմը նստած է Օջալանի աջ կողմում, իսկ Վեյսի Աքթաշը՝ ձախ կողմում։ Նրա թիկունքում ձախից աջ կանգնած են Էրգին Աթաբեյը, Մահմութ Յամալաքը, Զեքի Բայհանը և Օմեր Հայրի Քոնարը։ Օջալանը հայտարարել է, որ զինյալ խմբավորումը կարող է արագորեն զենքը վայր դնել, սակայն ժողովրդավարական քաղաքականության անցումն ապահովելու համար թուրքական քաղաքական շրջանակի ստեղծումը կարևորագույն նշանակություն կունենա, փոխանցում է Turkish Minute-ը։
Աբդուլլահ Օջալանի հայտարարությունը հնչում է ուրբաթ Հյուսիսային Իրաքում կայանալիք PKK-ի զինյալների առաջին խմբի կողմից զենքերը վայր դնելու արարողությունից առաջ՝ երկու ամիս անց այն բանից հետո, երբ խումբը հայտարարել էր, որ ավարտում է տասնամյակներ շարունակվող զինված պայքարը թուրքական պետության դեմ։
«Զենքերը վայր դնելու մանրամասները կորոշվեն և կիրականացվեն արագ։ Զենքերը վայր դնելու մեխանիզմի ստեղծումը կխթանի գործընթացը։ Սա կամավոր անցում է զինված հակամարտության փուլից դեպի ժողովրդավարական քաղաքականության և իրավունքի փուլ։ Ես հավատում եմ քաղաքականության և սոցիալական խաղաղության, այլ ոչ թե զենքի ուժին։ Եվ ես կոչ եմ անում ձեզ գործնականում կիրառել այս սկզբունքը»,- տեսաուղերձում ասել է Օջալանը։
Աբդուլլահ Օջալանը, որը 1999 թվականից ցմահ ազատազրկման է դատապարտվել Ստամբուլի մոտ գտնվող Իմրալը բանտային կղզում, ասել է, որ խաղաղության գործընթացը կառավարելու համար խորհրդարանական վերահսկողության հանձնաժողովի ստեղծումը «կարևորագույն» կլինի։
«Զենքերը կամավոր վայր դնելու ընդհանուր գործընթացը և Թուրքիայի Մեծ Ազգային ժողովի կողմից ստեղծվելիք համապարփակ հանձնաժողովը կարևորագույն նշանակություն ունեն։ Անհրաժեշտ են զգուշություն և զգայունություն»,- նշել է նա։
Օջալանն ընդգծել է, որ գրել է «ժողովրդավարական հասարակության» նոր մանիֆեստ՝ զինված պայքարից ժողովրդավարական քաղաքականության անցնելու համար։
«Խաղաղ և ժողովրդավարական հասարակության նպատակին հասնելը, որտեղ բոլորը կատարում են իրենց դերը, հնարավոր է դրական ինտեգրացիոնիստական հեռանկարի միջոցով։ Քուրդիստանի աշխատավորական կուսակցությունը (PKK) հրաժարվել է ազգային պետություն ստեղծելու իր նպատակից, և հրաժարվելով այս հիմնարար նպատակից՝ հրաժարվել է նաև իր հիմնարար պատերազմական ռազմավարությունից»,- հայտարարել է Օջալանը։
Քրդամետ «Ժողովուրդների հավասարություն և ժողովրդավարություն» կուսակցությունը (DEM), որը Թուրքիայի խորհրդարանի երրորդ ամենամեծ խմբակցությունն ունի և կարևոր դեր է խաղացել Օջալանի ու Թուրքիայի կառավարության միջև շփումները հեշտացնելու գործում, ներկայացրել է խորհրդարանական հանձնաժողով ստեղծելու առաջարկ, որը հավանաբար, կստեղծվի հուլիսի կեսերին։
Դիտորդները սպասում են, որ զենքը վայր դնելու գործընթացի զարգացմանը զուգընթաց՝ Անկարան նոր բաց քաղաքականություն կցուցաբերի քրդերի նկատմամբ, որոնք առանձին մշակույթ և լեզու ունեցող ազգային փոքրամասնություն են և կազմում են Թուրքիայի 85 միլիոն բնակչության մոտ 20 տոկոսը։
Թարգմանությունը՝ Էմմա Չոբանյանի
