23.05.2026 | 20:32
Մենք ամենափորձառու ուժն ենք, իշխանությունը մեր դեմ դնելու բան չունի. Էդմոն Մարուքյան. ՏԵՍԱՆՅՈՒԹ
Հայաստանից Վրաստան մուտք գործած բեռնատարում 298 կգ հերոին է հայտնաբերվել
Քաղաքականություն
18.06.2025 | 18:14
Վրաստանի Ներքին գործերի նախարարությունը բռնագրավել է 298 կիլոգրամ հերոին, որի արժեքը «սև շուկայում» կազմում է մոտ 85 միլիոն լարի (31 մլն դոլար), գրում են վրացական լրատվամիջոցները։
Ներքին գործերի փոխնախարար Ալեքսանդր Դարախվելիձեն հայտնել է, որ Վրաստանի քաղաքացի է ձերբակալվել առանձնապես խոշոր չափերով թմրանյութերի ապօրինի ձեռքբերման և պահպանման, ինչպես նաև Վրաստան թմրանյութերի ապօրինի ներմուծման մեղադրանքով։
Հետաքննությունը պարզել է, որ բեռնատարը, որը, ըստ մաքսային փաստաթղթերի, բեռնված է եղել հրակայուն աղյուսներով, Վրաստան է մտել Հայաստանի Հանրապետությունից՝ Գուգութիի մաքսային անցակետով և պետք է Բաթումիով դուրս գար Եվրոպա։
Բեռնատարի կցորդի մանրամասն զննման ժամանակ, որը գտնվում է մաքսային տնտեսական գոտու տարածքում, իրավապահ մարմինների աշխատակիցները հայտնաբերել են 600 պլաստիկ տարա՝ կեղծ աղյուսներով։ Տարաները պարունակել են 298 կիլոգրամ «հերոին» տեսակի թմրամիջոց։
Վրաստանի ՆԳՆ ղեկավարն ասել է, որ իրավապահ մարմինների աշխատակիցները ակտիվորեն շարունակում են համապատասխան համալիր միջոցառումները՝ նշված թմրանյութերի ապօրինի շրջանառության մեջ ներգրավված այլ անձանց հայտնաբերելու և նրանց հետապնդելու համար։
Հետաքննությունը տարվում է Վրաստանի քրեական օրենսգրքի 260-րդ և 262-րդ հոդվածներով։ Հանցագործությունը պատժվում է մինչև 20 տարի կամ ցմահ ազատազրկմամբ։
Թարգմանությունը՝ Էմմա Չոբանյանի
