Ֆրանսիան պատրաստ է օգնել Իսրայելին պաշտպանվել, բայց չի մասնակցի Իրանի դեմ հարձակողական գործողություններին. Մակրոն

Ֆրանսիայի նախագահ Էմանուել Մակրոնը հայտարարել է, որ Իսրայելի տարածքի վրա Իրանի հարձակման դեպքում Ֆրանսիան պատրաստ է օգնել պաշտպանական գործողություններում, «եթե նման հնարավորություն ունենա»: Ընդ որում, նա ընդգծել է, որ Ֆրանսիայի աջակցությունն Իսրայելին անվերապահորեն չէ և ունի իր սահմանները, և մասնավորապես, Իրանի դեմ հարձակողական գործողություններին Ֆրանսիան չի մասնակցի: Այս մասին փոխանցում է BBC-ի ռուսական ծառայությունը։

Մակրոնն ասել է նաև, որ Իրանի միջուկային ծրագիրն իսկապես մոտ էր կրիտիկական փուլին, սակայն այդ խնդիրը դեռևս կարելի է լուծել դիվանագիտական ճանապարհով:

Ըստ աղբյուրի՝ գրեթե միաժամանակ, թեև չհիշատակելով Մակրոնի խոսքերը, իսրայելական բանակի ներկայացուցիչը հայտարարել է, որ Իսրայելն ի վիճակի է պաշտպանվել Իրանի ցանկացած պատասխան գործողություններից՝ առանց դաշնակիցների օգնության:

Հիշեցնենք, որ Իսրայելի ռազմաօդային ուժերը հունիսի լույս 13-ի գիշերը հարվածել են Իրանի տարածքին, որից հետո Իսրայելը փակել է իր օդային տարածքը: Իսրայելի  բանակի տվյալներով՝ հարվածները հասցվել են Իրանում միջուկային ծրագրի և այլ ռազմական օբյեկտների հետ կապված տասնյակ թիրախների։ Իսրայելական  բանակը հայտնել է, որ գիշերը հարվածներ են հասցվել Իրանում ավելի քան 100 թիրախների: Գործողությանը մասնակցել է 200 կործանիչ: Հաղորդվում է, որ զոհվել է Իրանի ԶՈՒ-ի երեք բարձրաստիճան հրամանատար, ինչպես նաև 6 միջուկային գիտնական: Իրանի «Ֆարս» լրատվական գործակալությունը հաղորդում է, որ գիշերը Իսրայելի հարվածների հետևանքով զոհվել է 78 մարդ։