16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Վահագն Խաչատուրյանը հանդիպել է Իրաքի նախագահի հետ
Քաղաքականություն
10.06.2025 | 17:10
Ֆրանսիայի Հանրապետություն կատարած աշխատանքային այցի շրջանակում Հանրապետության նախագահ Վահագն Խաչատուրյանը հանդիպում է ունեցել Իրաքի Հանրապետության նախագահ Աբդ ալ Լատիֆ Ջամալ Ռաշիդի հետ․ հայտնում են ՀՀ նախագահի աշխատակազմից։
«Հանդիպման ընթացքում քննարկվել են Հայաստան-Իրաք երկկողմ հարաբերությունների օրակարգին վերաբերող մի շարք հարցեր։ Երկուստեք ընդգծվել է հայ-իրաքյան հարաբերությունների դինամիկ զարգացման և փոխադարձ շահագրգռվածության հիման վրա կառուցվող քաղաքական երկխոսության ու գործնական համագործակցության խորացման անհրաժեշտությունը։
Զրուցակիցներն անդրադարձել են նաև տարածաշրջանային զարգացումներին, խաղաղությանն ու կայունությանը վերաբերող հարցերին՝ ընդգծելով արդյունավետ գործընկերության և փոխվստահության ձևավորման կարևորությունը»,- ասված է հաղորդագրությունում։
Կողմերը կարևորել են երկկողմ տնտեսական փոխգործակցության ընդլայնումը՝ հատկապես առևտրի, ներդրումների և փոխադարձ հետաքրքրություն ներկայացնող ոլորտներում։ Այս համատեքստում ընդգծվել է Երևան-Բաղդադ ուղիղ թռիչքների ներդրման անհրաժեշտությունը՝ որպես քաղաքական, տնտեսական և զբոսաշրջային կապերի խթանման կարևոր գործիք։
Նշվում է, որ նախագահներն անդրադարձել են նաև միջկառավարական հանձնաժողովների աշխատանքների ակտիվացման հնարավորություններին՝ նպատակ ունենալով խորացնել ոլորտային համագործակցությունը և ձևավորել նոր նախաձեռնությունների իրականացման գործնական հիմքեր։
Զրուցակիցները քննարկել են նաև 2026 թվականին Հայաստանում կայանալիք ՄԱԿ Կենսաբազմազանության մասին կոնվենցիայի COP-17 համաժողովի կազմակերպչական և բովանդակային հարցերը՝ կարևորվել է գլոբալ հիմնախնդիրների լուծման հարցում նման միջոցառումների անցկացումը։
