06.05.2024 | 17:34
Կոշտ պատասխան են ստանալու, եթե շարժումը որոշեն ծառայեցնել խմբային շահերի համար․ Սուրեն Պետրոսյան․ ՏԵՍԱՆՅՈՒԹ
Վստահ եմ՝ այն աստիճան միակուսակցական համակարգ չի լինի, ինչ եղել է 20 տարի ՀՀԿ-ի օրոք. Հրաչյա Հակոբյան. ՏԵՍԱՆՅՈՒԹ
Քաղաքականություն
11.10.2018 | 19:35
Վարչապետ Նիկոլ Փաշինյանը հրաժարականի ճանապարհով խորհրդարանի լուծարմանը հասնելու իր որոշումը համաձայնեցրել է թիմակիցների հետ: Այս մասին Factor.am-ի հետ զրույցում հայտարարեց ԱԺ «Ելք» խմբակցության պատգամավոր Հրաչյա Հակոբյանը:
«Նման որոշումները կայացնում է ոչ թե ամբողջ կուսակցությունը, այլ վարչությունը, իսկ վարչությունում կարծում եմ՝ եղել է այդ համաձայնությունը»,- նշեց պատգամավորը՝ հավելելով, որ որոշումը կայացվել է երկար ծանրութեթև անելուց հետո:
Նշենք, որ վարչապետ Փաշինյանը երեկ France24-ի հետ զրույցում հայտնել է իր հրաժարականի ժամկետները՝ մինչև հոկտեմբերի 16-ը:
Հրաչյա Հակոբյանի պնդմամբ՝ թեև ընտրություններն անցկացվելու են դեկտեմբերին, այնուամենայնիվ «Քաղաքացիական պայմանագիր» կուսակցությունը պատրաստ է ընտրություններին: «Մենք գրեթե ամեն շաբաթ-կիրակի մարզերում գրասենյակներ ենք բացում, այնպես որ կուսակցությունը պատրաստ է ընտրություններին թե՛ տեխնիկապես, թե՛ մարդկային ռեսուրսներով»,- մանրամասնեց ՔՊ ներկայացուցիչը։
Հակոբյանի փոխանցմամբ՝ կուսակցության վարչության կազմն արդեն քննարկում է ցուցակների հարցը և որոշում, թե ինչ սկզբունքով է այն կազմվելու:
Պատգամավորը նաև չբացառեց ընտրություններին դաշինքով մասնակցելու հնարավորությունը: «Վարչությունը քննարկում է, թե որ ուժերի հետ կարող ենք դաշինքով մասնակցել ընտրություններին, եթե, իհարկե, դաշինքով ենք մասնակցում»,- շարունակեց Հրաչյա Հակոբյանը:
Անդրադառնալով այս օրերին հնչող մտահոգություններին, որ Հայաստանը գնում է դեպի միակուսակցական համակարգ՝ «Ելք» խմբակցության պատգամավորը հակադարձեց. «Վստահ եմ՝ այն աստիճան միակուսակցական համակարգ չի լինի, ինչ եղել է 20 տարի ՀՀԿ-ի օրոք: Այդ տարիներին քաղաքական բոլոր գործողությունները պտտվում էին ՀՀԿ-ի շուրջ և անցնում էին Մելիք-Ադամյանով»:
Հարցազրույցն ամբողջությամբ՝ տեսանյութում:
Շողիկ Գալստյան
