Բաքվում շինծու գործերով նիստում ուսումնասիրվել են, իբր, «Սմերչ» համակարգով Մինգեչաուրին հարվածները

Բաքվի զինվորական դատարանում ընթացող  Արցախի ղեկավարների և այլ պաշտոնյաների շինծու գործերով նիստում, որին մասնակցել է Ադրբեջանի գլխավոր դատախազի ավագ օգնական Վուսալ Ալիևը, վերանայվել են տեղանքի զննման արձանագրությունները և փորձագիտական ​​​​եզրակացությունները՝ կապված 2020 թվականի 44-օրյա պատերազմի ընթացքում, իբր, Ադրբեջանի քաղաքացիական ենթակառուցվածքներին պատճառված վնասի և խաղաղ բնակիչների մահվան հետ, գրում են ադրբեջանական լրատվամիջոցները։

Նշվում է, թե փաստաթղթերի մի մասը վերաբերել է Մինգեչաուր քաղաքի հրետակոծությանը։

Ուսումնասիրված փաստաթղթերի հիման վրա պարզվել է, թե 2020 թվականի հոկտեմբերի 4-ին ժամը 22:00-ի սահմաններում, Ադրբեջանի չորրորդ խոշորագույն քաղաք Մինգեչաուր քաղաքը, ինչպես նաև այս քաղաքում գտնվող և երկիրը էլեկտրաէներգիայով ապահովող «Ադրբեջանի ջերմաէլեկտրակայան» սահմանափակ պատասխանատվությամբ ընկերությունը (ՍՊԸ), իբր, «դիտավորյալ հարվածների են ենթարկվել Հայաստանի զինված ուժերի կողմից՝ օգտագործելով մեծ ավերիչ հզորության «Սմերչ» համազարկային կրակի ռեակտիվ համակարգեր»։

Ըստ ադրբեջանական կողմի հաղորդագրության՝ պարզվել է, թե «Սմերչ»-ի հրթիռներից մեկը պայթել է Մինգեչաուր քաղաքի Բոզդաղ փողոցի 60-րդ տան դարպասի առջև։ Արդյունքում վնասվել է տունը, մի շարք մարդիկ մարմնական վնասվածքներ են ստացել։ Նշվել է, թե միջադեպի վայրից մինչև «Ադրբեջանի ջերմաէլեկտրակայան» հեռավորությունը 2800 մետր է, իսկ մինչև Մինգեչաուրի ջրամբարը՝ 5300 մետր։

Նշվում է, թե «Սմերչ»-ի հրթիռներից մեկը, իբր, ընկել է Մինգեչաուր քաղաքի Ազդրես բնակավայրում գտնվող «Ադրբեջանի ՋԷԿ» ՍՊԸ-ի 6-րդ և 7-րդ էներգաբլոկների միջև ընկած դատարկ տարածքում, ճեղքել է ասֆալտե մայթը 40 սանտիմետր խորությամբ, սակայն չի պայթել։

Դատականի նիստի ընթացքում նաև ասվել է, թե «հայկական զինված ուժերը դիտավորյալ հրետակոծել են Մինգեչաուր քաղաքը և հոկտեմբերի 4-ից հետո հրթիռային հարձակում են իրականացրել այդ ուղղությամբ։

Դատական նիստը շարունակվում է։

Թարգմանությունը՝ Էմմա Չոբանյանի