07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Փաշինյան-Գարեգին Բ առճակատումը նոր թափ է ստանում. առանցքում կաթողիկոսի կուսակրոնության հարցն է. ՏԵՍԱՆՅՈՒԹ
Քաղաքականություն
02.06.2025 | 21:38
Նիկոլ Փաշինյանը Երևանի պետական համալսարանից հեռանում է՝ Հայ առաքելական եկեղեցու և բարձրաստիճան հոգևորականների մասին վերջին օրերի իր աղմկահարույց գրառումները չմեկնաբանելով։ Լրագրողների հարցերն անպատասխան թողնելուց կարճ ժամանակ անց Փաշինյանը նոր գրառում արեց։ Այս անգամ օրակարգում Ամենայն Հայոց կաթողիկոս Գարեգին Բ-ի կողմից կուսակրոնության ուխտի պահպանման հարցն էր։
Մի քանի օր առաջ Փաշինյանն ակնարկել էր, որ պետությունը պետք է վճռորոշ ձայն ունենա Ամենայն հայոց կաթողիկոսի ընտրության հարցում։ Մայր Աթոռն արդեն չորրորդ օրն է՝ անարձագանք է թողնում եկեղեցականներին թիրախավորող Փաշինյանի գրառումները։ Factor TV-ն Մայր Աթոռի տեղեկատվական համակարգի տնօրեն Տեր Եսայի քահանա Արթենյանից հետաքրքրվեց՝ ինչո՞ւ Մայր Աթոռը չի արձագանքում Փաշինյանի՝ կաթողիկոսին ուղղված և մյուս գրառումներին։ Տեր Եսային փոխանցեց՝ առաջիկայում արձագանք կլինի։
«Սրբապիղծ «սրբազանների» հարցը պետք է լուծել»,- այսօր առավոտյան գրել էր Փաշինյանը, որն ավելի վաղ, առանց անուններ տալու, սրբազաններից մեկին մեղադրել էր քեռու կնոջ հետ սեռական կապի մեջ։
Աստվածաբան Վարդան Խաչատրյանը Factor TV-ի հետ զրույցում ասում է՝ եկեղեցին հսկայական կառույց է, որը չի կարող խնդիրներից զերծ մնալ։ Սակայն շեշտում է՝ սա իրավունք չի վերապահում իշխանությանը մտնել եկեղեցի ու ինչ-որ գործընթացներ իրականացնել։
Հայաստանի Սահմանադրության 17-րդ հոդվածի համաձայն՝ կրոնական կազմակերպություններն անջատ են պետությունից, Հայաստանի Հանրապետությունում երաշխավորվում է կրոնական կազմակերպությունների գործունեության ազատությունը: 18-րդ հոդվածով էլ շեշտվում է Հայ առաքելական եկեղեցու բացառիկությունը։
Եթե Սահմանադրությունը հստակ տարանջատում է պետության և եկեղեցու լիազորությունների շրջանակը, Նիկոլ Փաշինյանն օրենսդրական ի՞նչ կարգավորումների շրջանակում է միջամտում Մայր Աթոռի գործունեությանը։ ԱԺ պետաիրավական հարցերի հանձնաժողովի նախագահ, ՔՊ-ական պատգամավոր Վլադիմիր Վարդանյանը խուսափողական պատասխան է տալիս։
Շիրակի թեմի առաջնորդ Միքայել արքեպիսկոպոս Աջապահյանը Factor TV-ի հետ զրույցում անդրադառնալով, Փաշինյանի ձևակերպմամբ՝ «սրբապիղծ սրբազանների» հարցերը լուծելու գրառմանը, վարչապետին առաջարկում է նախ հայտնաբերել նրանց։
Հիշեցնենք՝ Շիրակի թեմի առաջնորդը, արձագանքելով Փաշինյանի մեղադրանքին, օրերս հայտարարել էր՝ «Էդ պոռոտախոսներից որևէ մեկը թող փորձի մի ամիս առանց կնոջ ապրել», ինչից հետո Փաշինյանն ավելի մեծ ջանասիրությամբ սկսեց թեման առաջ տանել։ Փաշինյանի դիրքորոշումը նաև թիմակիցներն են կիսում՝ չհստակեցնելով, թե օրինական ի՞նչ գործիքակազմով են տեսնում միջամտությունը եկեղեցու գործերին։
Աստվածաբան Վարդան Խաչատրյանը պետության ու եկեղեցու կոնֆլիկտն անթույլատրելի է համարում՝ նշելով, որ այն կարող է ծանրագույն հետևանքեր ունենալ իշխանության և հայ ժողովրդի համար։
Երևանի Տիկնիկային թատրոնի գեղարվեստական ղեկավար Ռուբեն Բաբայանն անթույլատրելի է համարում որևէ մեկի անձնական կյանքին միջամտությունը։ Բաբայանի խոսքով՝ եթե կա օրենքի խախտում, ապա դրանով պետք է միայն իրավապահ մարմինները զբաղվեն, ոչ թե քաղաքական մարմինները, այդ թվում՝ վարչապետը։ Բաբայանը, միաժամանակ, այս իրավիճակում տեսնում է թե՛ պետության, թե՛ եկեղեցու մեղավորությունը։
Շիրակի թեմի առաջնորդ Միքայել արքեպիսկոպոս Աջապահյանն իր մեկնաբանություն ունի, թե ինչու է Մայր Աթոռը միջամտում քաղաքական հարցերի։
Հիշեցնենք՝ Նիկոլ Փաշինյանի՝ վիրավորական բառերով և մեղադրանքներով գրառումները զուգադիպեցին «Կովկասյան բարոմետրի» սոցհարցման տվյալների հրապարակման հետ։ Ըստ այդմ՝ Հայ առաքելական եկեղեցուն վստահում է Հայաստանի բնակչության 71%-ը, մինչդեռ ՔՊ կուսակցությանը և Նիկոլ Փաշինյանին՝ ընդամենը 17%-ը։
Մանրամասները՝ տեսանյութում։
Նարեկ Կիրակոսյան
