11.12.2025 | 20:30
«Հարսնաքար»-ը, Գասպարյանի առանձնատունը, Միքայելյանի տնակը․ Սևանի ափի որ գույքերը կքանդի պետությունը
Ուկրաինան նախապես տեղեկացրել է Թրամփի վարչակազմին հարձակման մասին․ Axios
Քաղաքականություն
01.06.2025 | 19:38
Ինչպես ավելի վաղ հայտնել ենք, Ուկրաինայի անվտանգության ծառայությունը այսօր՝ հունիսի 1-ին, լայնածավալ գործողություն է իրականացնում՝ ուղղված ռուսական ռազմական ինքնաթիռների ոչնչացմանը:
Հարձակումը տեղի է ունեցել անմիջապես այն բանից առաջ, երբ Ուկրաինայի նախագահ Վլադիմիր Զելենսկին հայտարարեց, որ պատվիրակություն է ուղարկում պաշտպանության նախարար Ռուստեմ Ումերովի գլխավորությամբ՝ երկուշաբթի օրը Ստամբուլում Ռուսաստանի հետ հրադադարի բանակցությունների համար, գրում է Axios-ը։
Պարբերականը, հղում անելով իր աղբյուրներին, նշում է, որ Ուկրաինան նախապես տեղեկացրել է Թրամփի վարչակազմին հարձակման մասին։ Ուկրաինացի պաշտոնյան ԶԼՄ-ին ասել է, որ գործողությունն իրականացվել է երկրի անվտանգության ծառայության կողմից և ծրագրված է եղել ավելի քան մեկ տարի առաջ:
Ավելի ուշ Թրամփի վարչակազմը հերքել է այս տեղեկությունը։
Պաշտոնյան ասել է, որ հետախուզության աշխատակիցները հարձակման անօդաչու սարքեր են գործարկել բեռնատարներից, որոնք գաղտնի տեղադրված են եղել ռուսական ավիաբազաների մոտ, որոնցից մեկը Սիբիրում է, Ուկրաինայից հազարավոր կիլոմետրեր հեռու: Հաղորդվում է, որ գրոհի ժամանակ խոցվել է մոտ 40 ռուսական ռազմական ինքնաթիռ, այդ թվում՝ ռազմավարական ռմբակոծիչներ։
Ուկրաինացի պաշտոնյան ասել է, որ հարձակման ենթարկված ինքնաթիռներն օգտագործվել են ռուս զինվորականների կողմից ուկրաինական քաղաքների վրա օդային հարվածներ հասցնելու համար։ Վերջին 24 ժամվա ընթացքում Ռուսաստանը ծանր հարվածներ է հասցրել Ուկրաինայի քաղաքներին, այդ թվում՝ Կիևին։
Ըստ УНИАН գործակալության, ուկրաինական անօդաչու թռչող սարքերի հարձակմանն են ենթարկվել Մուրմանսկի մարզի «Օլենյա» և Իրկուտսկի մարզի «Բելայա» օդանավակայանները։
