Հասարակություն
29.05.2025 | 14:10
Բնապահպանության և ընդերքի տեսչական մարմնի ղեկավար Հովհաննես Մարտիրոսյանը 6 անշարժ գույք ունի, որոնք բոլորը ձեռք է բերել 2021 թվականին՝ պաշտոնը ստանձնելուց անմիջապես հետո։
Կոռուպցիայի կանխարգելման հանձնաժողով նրա ներկայացրած գույքի և եկամուտների հայտարարագրից տեղեկանում ենք, որ Մարտիրոսյանը Երևանում ունի 2 անհատական բնակելի տուն, հողին ամրակայված 2 այլ անշարժ գույք, ավտոտնակ և հողամաս։ Նա վարում է MERCEDES-BENZ մակնիշի ավտոմեքենա։
Հովհաննես Մարտիրոսյանը 2024-ին ստացել է 14․7 մլն դրամ աշխատավարձ և 1․2 մլն դրամ կենսաթոշակ ոստիկանությունից։ Ունի 4 վարկ՝ ընդհանուր 7․1 մլն դրամ ծավալով։ Տարեվերջին Մարտիրոսյանի բանկային հաշվին եղել է 1․1 մլն դրամ, կանխիկ գումար նա չի հայտարարագրել։
Մարտիրոսյանի կինը՝ Նոննա Սահակյանը, 2024 թվականի համար հայտարարագիր դեռ չի ներկայացրել։ 2023-ի հայտարարագրի համաձայն՝ նա «Կաիսա» զարգացման կենտրոնում մարզիչ է աշխատել և ստացել է 242 հազար դրամ աշխատավարձ, նաև զբաղվել է ձեռնարկատիրական գործունեությամբ, ինչի արդյունքում ստացել է 6․4 մլն դրամ, 4932 եվրո և 6099 դոլար եկամուտ։
Սահակյանը բանկային հաշվին ունեցել է 7200 եվրո, 122 ռուբլի, 10․6 հազար դոլար, 120 հազար դրամ, կանխիկ՝ 9550 եվրո, 23․5 հազար դոլար, 3 մլն դրամ։
