23.04.2026 | 22:53
Թրամփը հայտարարել է, թե Իրանը չգիտի՝ ով է իր առաջնորդը
Բաքուն հերքել է Խոզնավարի ուղղությամբ կրակելու մասին ՀՀ ՊՆ հայտարարությունը
Քաղաքականություն
29.05.2025 | 14:02
Ադրբեջանի ռազմական գերատեսչությունն արձագանքել է Սյունիքի մարզի Խոզնավար բնակավայրի ուղղությամբ կրակ բացելու մասին ՀՀ Պաշտպանության նախարարության հայտարարությանը։ Չնայած ապացույցներին՝ Բաքուն հերքել է միջադեպը։
«ՀՀ պաշտպանության նախարարության կողմից տարածված տեղեկատվությունը, թե մայիսի 29-ին ժամը 01:00-ից մինչև 01:15-ը, ադրբեջանական բանակի ստորաբաժանումները կրակ են բացել Խոզնավար բնակավայրի ուղղությամբ և վնասել բնակելի շենք, ևս մեկ ապատեղեկատվություն է և չի համապատասխանում իրականությանը»,- ասվում է հայտարարության մեջ։
Նշվում է, թե, իբր, «հակառակ կողմը, նման միտումնավոր ապատեղեկատվություն և կեղծ լուրեր տարածելով, փորձում է միջազգային հանրության մոտ աղավաղված կարծիք ձևավորել և հող ստեղծել հետագա սադրանքների համար»։
«Հայտարարում ենք, որ ադրբեջանական բանակի ստորաբաժանումները երբեք կրակ չեն բացում քաղաքացիական անձանց և քաղաքացիական օբյեկտների ուղղությամբ»,- նշել է Ադրբեջանի ՊՆ-ն։
Հիշեցնենք՝ ՀՀ ՊՆ-ն հայտնել էր, որ մայիսի 29-ին՝ ժամը 01:00-01:15-ն ընկած ժամանակահատվածում, Ադրբեջանի ԶՈՒ ստորաբաժանումները կրակ են բացել Սյունիքի մարզի Խոզնավար բնակավայրի ուղղությամբ, ինչի հետևանքով վնասվել է բնակելի տուն, տուժածներ չկան: ՀՀ պաշտպանական գերատեսչությունն ադրբեջանական կողմին կոչ էր հետաքննել Խոզնավարի բնակելի տան գնդակոծման փաստը և հանդես գալ հրապարակային պարզաբանումներով։
Թարգմանությունը՝ Էմմա Չոբանյանի
