12.01.2026 | 14:54
Ալեքսանդր Օվեչկինը հերթական գոլն է խփել և մոտենում է Ուեյն Գրետցկիի ռեկորդին․ ՏԵՍԱՆՅՈՒԹ
Ըստ ԱՄՆ հետախուզության՝ ՌԴ-ն տեղեկատվական գործողություններ է կիրառել ՀՀ ժողովրդավարությունը, ավելի արևմտամետ ղեկավարությանը վարկաբեկելու համար
Քաղաքականություն
28.05.2025 | 11:30
ԱՄՆ Պաշտպանության նախարարության հետախուզության գործակալությունը (DIA) «2025 թվականի գլոբալ սպառնալիքների գնահատում» զեկույցում անդրադարձ է կատարել վերջին տարիներին Հարավային Կովկասի տարածաշրջանում Ռուսաստանի ազդեցությանը։
Մասնավորապես, նշվում է Ռուսաստանի կողմից Հայաստանի նկատմամբ կիրառված տեղեկատվական գործողությունները։
«Ռուս-հայկական հարաբերությունները վատթարացել են անցյալ տարի, քանի որ Հայաստանը սպառնացել էր դուրս գալ Հավաքական անվտանգության պայմանագրի կազմակերպությունից, իսկ Ռուսաստանը տեղեկատվական գործողություններ է կիրառել՝ հայկական ժողովրդավարությունը և դրա ավելի արևմտամետ ղեկավարությանը վարկաբեկելու համար»,- ասվում է զեկույցում։
Վրաստանի մասով նշվում է, որ Ռուսաստանը «գրեթե անկասկած նպատակ ունի» երկիրը վերադարձնել իր ազդեցության ոլորտ։ Հոկտեմբերին կայացած խորհրդարանական ընտրություններից ի վեր «Վրացական երազանքի» գլխավորած կառավարությունը ստեղծել է մի միջավայր, որը թույլ է տալիս Ռուսաստանին մեծացնել իր ազդեցությունը երկրում։
Ադրբեջանի հետ կապված զեկույցում անդրադարձ չկա։
Նշվում է նաև, որ Ռուսաստանը Կենտրոնական Ասիայում ունի խորը պատմական, տնտեսական, քաղաքական, ռազմական և մշակութային կապեր, որոնք թույլ են տալիս նրան պահպանել կայուն, թեև որոշ չափով անհավասար ազդեցություն տարածաշրջանում։ Ըստ զեկույցի՝ Ռուսաստանը Կենտրոնական Ասիայի անվտանգությունը համարում է իր անբաժանելի մասը և օգտագործում է երկկողմ ու բազմակողմ համագործակցության համաձայնագրերը՝ անվտանգության ճարտարապետությունը վերահսկելու համար, այդ թվում՝ ՀԱՊԿ-ի, ԱՊՀ-ի և Շանհայի համագործակցության կազմակերպության միջոցով: Մոսկվան նաև օգտագործում է Կենտրոնական Ասիայի կախվածությունը ռուսական գազի և նավթի ենթակառուցվածքներից՝ տարածաշրջանի երկրների վրա ճնշում գործադրելու միջոցով իր նպատակներին հասնելու համար:
Թարգմանությունը՝ Էմմա Չոբանյանի
