13.01.2026 | 15:15
Երբ ադրբեջանական զորքերը դուրս կգան ՀՀ տարածքից՝ ըստ Պապիկյանի//ՀՅԴ-ն ընտրությունների դաշինքով կգնա․ ԼՈՒՐԵՐ
ԱԹՍ-ների հարձակումների պատճառով Մոսկվայի օդանավակայաններում կոլապս է․ ավելի քան 160 չվերթ է հետաձգվել
Քաղաքականություն
22.05.2025 | 16:29
Մոսկվայի օդանավակայանների աշխատանքում սահմանափակումների պատճառով առնվազն 162 չվերթ է հետաձգվել։ Այս մասին հայտնում է տարածաշրջանային տրանսպորտային դատախազությունը, գրում է Meduza-ն։
Գերատեսչության տվյալներով՝ մայիսի 22-ին, տեղի ժամանակով 11:00-ի դրությամբ, «Շերեմետևո» օդանավակայանում ուշացել է 72 չվերթ, «Դոմոդեդովո»-ում՝ 71, իսկ «Վնուկովո»-ում՝ 19 չվերթ։
Ավելի վաղ՝ մայիսի 22-ի գիշերը և առավոտյան, Ռոսավիացիան Մոսկվայի և Ժուկովսկիի օդանավակայաններում չվերթների ժամանման և մեկնման ժամանակավոր սահմանափակումներ էր մտցրել։ Մոսկվայի իշխանությունները երկրորդ օրն անընդմեջ պարբերաբար հաղորդում են տարածաշրջանում անօդաչու թռչող սարքերի խոցման մասին։
Ռուսաստանի ՊՆ-ն հայտնել է, որ գիշերվա ընթացքում ՀՕՊ ուժերը խոցել են ուկրաինական 105 անօդաչու թռչող սարք, որոնցից 35-ը գտնվել է Մոսկվայի մարզի տարածքում։
Ռոսավիացիայի հաղորդմամբ՝ մայիսի 21-22-ին, ընդհանուր առմամբ, 82 ինքնաթիռ է ուղղորդվել դեպի այլընտրանքային օդանավակայաններ։
«Գրեթե բոլորն արդեն վայրէջք են կատարել իրենց սկզբնական նշանակման օդանավակայաններում»,- ասվում է գերատեսչության մամուլի ծառայության հայտարարության մեջ։
Միաժամանակ, ռուսական տելեգրամ ալիքները հաղորդում են, որ Մոսկվայի օդանավակայաններում կոլապս է առաջացել։ Ռոսավիացիան, սակայն, հերքել է։
«Չնայած ժամանակացույցի փոփոխություններին՝ օդանավակայաններում իրավիճակը հանգիստ է, ուղևորների զանգվածային կուտակումներ չկան, ինչպես փորձում են ներկայացնել որոշ անբարեխիղճ լրատվամիջոցներ»,- ասվում է գերատեսչության հայտարարության մեջ։
Թարգմանությունը՝ Էմմա Չոբանյանի
