29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Բաքվում շինծու գործերով նիստում, իբր, միջազգային կազմակերպության զեկույց է ներկայացվել «հայկական ուժերի հանցանքների» մասին
Քաղաքականություն
16.05.2025 | 19:38
Բաքվի զինվորական դատարանում շարունակվող Արցախի ղեկավարների ու պաշտոնյաների նկատմամբ հարուցված շինծու գործերով նիստում ուսումնասիրվել են, իբր, միջազգային իրավապաշտպան կազմակերպության փաստաթղթեր, «որոնք պարունակում են փաստեր 1993 թվականին Ադրբեջանի տարածքում հայկական զինված ուժերի կողմից դաժան հարձակման և խաղաղ բնակիչների սպանության մասին»։ Այս մասին հայտնում են ադրբեջանական լրատվամիջոցները։
Չի նշվում, սակայն, թե կոնկրետ ո՞ր իրավապաշտպան կազմակերպության մասին է խոսքը։
Կազմակերպության զեկույցում, իբր, նաև տրամադրվում է «տեղեկատվություն քաղաքացիական բնակչության գույքի լայնածավալ թալանի և ոչնչացման մասին, ինչպես նաև խոսվում է 1993 թվականի հուլիսին հայկական բանակի կողմից Աղդամի գրավման և քաղաքի թալանման մասին»։
Զեկույցում նաև ասվում է, թե, իբր, «այդ ժամանակահատվածում Հայաստանը կոպտորեն խախտել է Ժնևի կոնվենցիաները՝ կատարելով պատերազմական հանցագործություններ»։
Դատական նիստը շարունակվում է։
Թարգմանությունը՝ Էմմա Չոբանյանի
