08.10.2026 | 10:22
Երևան–Սևան ճանապարհին միկրոավտոբուս է կողաշրջվել․ 8 տուժած կա
Թրամփն ու Սաուդյան Արաբիայի թագաժառանգը 142 միլիարդ դոլարի պաշտպանական պայմանագիր են ստորագրել
Քաղաքականություն
13.05.2025 | 22:46
ԱՄՆ նախագահ Դոնալդ Թրամփը և Սաուդյան Արաբիայի թագաժառանգ Մուհամմեդ բին Սալմանը Ռիադում ստորագրել են ռազմավարական տնտեսական գործընկերության համաձայնագիր։ Գործընկերությունը ներառում է էներգետիկայի, հանքարդյունաբերության և պաշտպանության ոլորտներում պայմանագրեր, գրում է Reuters-ը։
ԱՄՆ-Սաուդյան Արաբիայի նոր պաշտպանական համաձայնագրի արժեքը կազմում է գրեթե 142 միլիարդ դոլար։ Այս մասին հայտարարել է Սպիտակ տունը՝ նշելով, որ Սաուդյան Արաբիան պատրաստվում է 600 միլիարդ դոլար ներդնել Ամերիկայում։
Երկու երկրների կնքած պայմանագրերի թվում է գրեթե 142 միլիարդ դոլարի արժողությամբ պաշտպանական ապրանքների վաճառքի մասին գործարքը, որի միջոցով ԱՄՆ-ը կտրամադրի «ժամանակակից ռազմական սարքավորումներ և ծառայություններ տասնյակից ավելի ամերիկյան պաշտպանական ընկերություններից»։ Այդ սարքավորումները ներառում են հինգ կատեգորիա, այդ թվում՝ օդային և հրթիռային պաշտպանություն և սահմանային անվտանգություն։
Սաուդյան Արաբիան նաև պարտավորվել է 20 միլիարդ դոլար ներդնել արհեստական բանականության տվյալների կենտրոններում և ԱՄՆ էներգետիկ ենթակառուցվածքներում։
Սպիտակ տունը հայտնել է, որ Google-ը, DataVolt-ը, Oracle-ը, Salesforce-ը, AMD-ն և Uber-ը պարտավորվել են երկու երկրներում տեխնոլոգիաների ոլորտում 80 միլիարդ դոլար ներդնել։
Հիշեցնենք, որ Թրամփը Սաուդյան Արաբիա է ժամանել այսօր։ Սա նրա առաջին պաշտոնական այցն է նախագահության երկրորդ ժամկետում։ Այնուհետև ԱՄՆ նախագահը կմեկնի Կատար և ԱՄԷ։
Թարգմանությունը՝ Էմմա Չոբանյանի
