ԵՄ-ն պատրաստ է նոր պատժամիջոցներ մշակել ՌԴ-ի նկատմամբ, եթե Մոսկվան մինչև օրվա վերջ չհամաձայնվի հրադադարին

Եվրոպական երկրները կսկսեն Ռուսաստանի դեմ նոր պատժամիջոցների նախապատրաստումը, եթե Մոսկվան մինչև օրվա վերջ չհամաձայնի հրադադարին, գրում է BBC-ի ռուսական ծառայությունը։

«Ժամանակը սպառվում է, մենք դեռ 12 ժամ ունենք մինչև օրվա ավարտը, և եթե մինչ այդ հրադադար չհաստատվի, եվրոպական կողմը կսկսի պատրաստվել պատժամիջոցներին»,- հայտարարել է Գերմանիայի կառավարության խոսնակ Ստեֆան Կոռնելիուսը։

Մի շարք եվրոպական առաջնորդներ, այդ թվում՝ Գերմանիայի կանցլեր Ֆրիդրիխ Մերցը, ավելի վաղ հայտարարել էին, որ ցանկացած բանակցություն պետք է նախորդի հրադադարին։

DW-ն էլ, վկայակոչելով դիվանագիտական աղբյուրներին, հայտնում է, որ Ուկրաինայի նկատմամբ ագրեսիայի համար Ռուսաստանի դեմ Եվրամիության նոր՝ 17-րդ պատժամիջոցների փաթեթը կարող է ընդունվել ԵՄ երկրների դեսպանների մակարդակով արդեն չորեքշաբթի՝ մայիսի 14-ին։

Դիվանագետները նշում են, որ այս փաթեթը որևէ առանձնահատուկ տարաձայնություն չի առաջացրել ԵՄ պետությունների պատվիրակությունների շրջանում, և դեսպանների մակարդակով քննարկումը արագ է ընթացել։ Միաժամանակ, մի քանի պատվիրակություններ լրացուցիչ ժամանակ են խնդրել՝ Եվրահանձնաժողովի կողմից ներկայացված նոր փոփոխություններն ուսումնասիրելու համար։ 17-րդ փաթեթի հաջորդ քննարկումը նախատեսված է մայիսի 14-ին, և դիվանագետները չեն բացառում դրա հաստատումը։ Այս դեպքում պատժամիջոցների պաշտոնական ընդունումը կարող է տեղի ունենալ ԵՄ Արտաքին գործերի խորհրդի նիստում, որը կկայանա մայիսի 20-ին։

«Մենք ծրագրում ենք այն ընդունել մայիսի 20-ին կայանալիք Արտաքին գործերի խորհրդի նիստում։ Դրանում շատ բան կա, բայց դեռևս լիովին համաձայնեցված չէ։ Որպեսզի Ռուսաստանը խաղաղություն ցանկանա, մենք պետք է ավելի շատ ճնշում գործադրենք, և պատժամիջոցները գործիքներից մեկն են»,- ասել էր ԵՄ դիվանագիտության ղեկավար Կայա Կալլասը:

Հայտնի է, որ նոր պատժամիջոցների փաթեթի կարևոր տարրերից մեկը կլինի ռուսական «ստվերային նավատորմի» լրացուցիչ նավերի ընդգրկումը սև ցուցակում։ Որոշ տեղեկությունների համաձայն՝ դրանց թիվը կարող է հասնել 200-ի։ Կընդլայնվի նաև ֆիզիկական և իրավաբանական անձանց պատժամիջոցների ցանկը։

Բացի այդ, Եվրամիությունն ունի պատժամիջոցների ռեժիմ Ռուսաստանի Դաշնության դեմ՝ հիբրիդային գործունեության, ինչպես նաև մարդու իրավունքների խախտումերի համար, որը վերաբերում է Ռուսաստանի Դաշնությունից ժամանած անձանց, և քիմիական զենքի օգտագործման համար պատժամիջոցների ռեժիմ, որը կարող է կիրառվել նաև քիմիական զենքի օգտագործման մեջ կասկածվող ՌԴ-ից ժամանած անձանց նկատմամբ։

Հիշեցնենք, որ մայիսի 10-ին Ուկրաինայի իշխանությունները հայտարարել էին, որ պատրաստ են «լիակատար և անվերապահ հրադադարի ցամաքում, օդում և ծովում առնվազն 30 օրով», որը կսկսվի մայիսի 12-ից։ Մայիսի 11-ի գիշերը Ռուսաստանի նախագահ Վլադիմիր Պուտինն առաջարկել էր մայիսի 15-ին Ստամբուլում ուղիղ բանակցություններ սկսել։ Ուկրաինան և նրա եվրոպացի դաշնակիցները հայտարարել էին, որ Ռուսաստանը նախ պետք է համաձայնի 30-օրյա հրադադարի՝ նախքան բանակցությունների մեկնարկը։ ԱՄՆ նախագահ Դոնալդ Թրամփն էլ  իր հերթին կոչ էր արել Ուկրաինային հնարավորինս շուտ բանակցություններ սկսել Ռուսաստանի հետ։ Ուկրաինայի նախագահ Վլադիմիր Զելենսկին հայտարարել էր, որ պատրաստ է անձամբ հանդիպել Պուտինի հետ Ստամբուլում։

Թարգմանությունը՝ Էմմա Չոբանյանի