18.02.2026 | 14:44
Իրանի և Ռուսաստանի ռազմածովային ուժերը վաղը համատեղ զորավարժություններ կանցկացնեն
Մարկո Ռուբիոն մայիսի 14-15-ը Թուրքիա կմեկնի
Քաղաքականություն
12.05.2025 | 11:08
ԱՄՆ պետքարտուղար Մարկո Ռուբիոն պատրաստվում է այցելել Թուրքիա, ինչպես նաև Սաուդյան Արաբիա և Կատար։ ԱՄՆ Պետքարտուղարության հաղորդմամբ՝ Մարկո Ռուբիոն մայիսի 11-14-ը «նախագահ Թրամփին կուղեկցի Սաուդյան Արաբիա և Կատար, որտեղ նախագահը կփորձի ամրապնդել կապերը Միացյալ Նահանգների և Պարսից ծոցի գործընկերների միջև»։
Այնուհետև Ռուբիոն մայիսի 14-16-ը կմեկնի Թուրքիա՝ Անթալիայում մասնակցելու ՆԱՏՕ-ի ԱԳ նախարարների ոչ պաշտոնական հանդիպմանը՝ քննարկելու դաշինքի անվտանգության առաջնահերթությունները, այդ թվում՝ դաշնակիցների պաշտպանության ոլորտում ներդրումների ավելացումը և Ռուսաստան-Ուկրաինա պատերազմի ավարտը։
«Հունիսին Հաագայում կայանալիք ՆԱՏՕ-ի գագաթնաժողովին ընդառաջ պետքարտուղարն առաջ կմղի նախագահ Թրամփի օրակարգը՝ ապահովելու համար, որ մեր դաշնակիցներն իրենց արդարացի ներդրումն ունենան ավելի ուժեղ և արդյունավետ ՆԱՏՕ-ի ձևավորման գործում»,- ասվում է հաղորդագրության մեջ։
Թուրքական լրատվամիջոցների հաղորդմամբ՝ մայիսի 14-15-ը Անթալիայում կայանալիք ՆԱՏՕ-ի արտաքին գործերի նախարարների ոչ պաշտոնական հանդիպումը հյուրընկալելու է երկրի արտգործնախարար Հաքան Ֆիդանը։
Հավելենք, որ պետքարտուղարի պաշտոնում սա Ռուբիոյի առաջին այցն է լինելու Թուրքիա։ Օրերս էլ հեռախոսազրույց էին ունեցել ԱՄՆ նախագահ Դոնալդ Թրամփն ու Թուրքիայի նախագահ Ռեջեփ Թայիփ Էրդողանը։ Վերջինը Թրամփին հրավիրել է Թուրքիա։ ԱՄՆ նախագահն էլ նշել է, որ Էրդողանն իրեն հրավիրել է ապագայում գնալ Թուրքիա, նա էլ կայցելի Վաշինգտոն։
Թարգմանությունը՝ Էմմա Չոբանյանի
