11.12.2025 | 20:30
«Հարսնաքար»-ը, Գասպարյանի առանձնատունը, Միքայելյանի տնակը․ Սևանի ափի որ գույքերը կքանդի պետությունը
Հռոմի պապի օծման պաշտոնական արարողությունը տեղի կունենա մայիսի 18-ին
Քաղաքականություն
09.05.2025 | 17:55
Լևոն XIV-ը պաշտոնապես Հռոմի պապ կօծվի մայիսի 18-ին մատուցվելիք պատարագի ժամանակ և կգլխավորի իր առաջին ընդհանուր լսումը մայիսի 21-ին։ Այս մասին հայտարարել է Վատիկանը, գրում է France 24-ը։
Այսօր Հռոմի նորընտիր պապն առաջին պատարագն է մատուցել Վատիկանի Սիքստինյան կապելլայում կարդինալների հետ։ Սպիտակ հանդերձանքով Պապը նախ մտել է Սիքստինյան կապելլա և օրհնել կարդինալներին՝ մոտենալով Միքելանջելոյի «Վերջին դատաստանը» որմնախորանին։
Իր առաջին քարոզում Հռոմի պապն ասել է, որ հույս ունի՝ իր ընտրությունը կարող է օգնել եկեղեցուն լույս բերել «այս աշխարհի մութ գիշերներին»։ Նա նշել է, որ Կաթոլիկ եկեղեցին պետք է իրեն նույնականացնի իր անդամների սրբությամբ, այլ ոչ թե «իր շենքերի վեհությամբ»։ Լևոն XIV-ն ասել է, որ եկեղեցին պետք է հասնի այն ոլորտներին, որտեղ կա «հավատի պակաս», և որտեղ մարդիկ նախընտրում են «տեխնոլոգիան, փողը, հաջողությունը, իշխանությունը կամ հաճույքը»։
«Հավատի պակասը հաճախ ողբերգականորեն ուղեկցվում է կյանքի իմաստի կորստով, ողորմածության անտեսմամբ, մարդկային արժանապատվության սարսափելի խախտումներով, ընտանիքի ճգնաժամով և մեր հասարակությանը հասցված բազմաթիվ այլ վերքերով»,- ասել է Հռոմի պապը։
Հիշեցնենք, որ նոր Հռոմի պապը՝ 69-ամյա Ռոբերտ Պրևոն, որն ընտրել է Լևոն (Լեո) XIV անունը, դարձել է Միացյալ Նահանգներից (և ընդհանրապես Հյուսիսային Ամերիկայից) առաջին պապը։
Թարգմանությունը՝ Էմմա Չոբանյանի
