«Համբա՛լ»․ 10 տարի անց Փաշինյանը գտե՞լ է իր երազանքի վարչապետին. ՏԵՍԱՆՅՈՒԹ

Փողոցային բառապաշարին բնորոշ արտահայտություններով երեկ Նիկոլ Փաշինյանն Ազգային ժողովում անկաշկանդ դիմում էր իր հետ վեճի բռնված ընդդիմադիր պատգամավորներին։ Ո՛չ վարչապետի կարգավիճակն էր կաշկանդում, ո՛չ ուղիղ եթերում լինելու հանգամանքը։

Քոչարյանական ընդդիմության և Փաշինյանի միջև հերթական սկանդալը ծագեց այն բանից հետո, երբ նախկին ՔՊ-ական, այժմ «Հայաստան» խմբակցության պատգամավոր Աննա Գրիգորյանը՝ հղում անելով մամուլի հրապարակումներին, իշխանությանը մեղադրեց կոռուպցիայի մեջ։ Փաշինյանն արձագանքեց կտրուկ՝ սպառնալով ընդդիմադիրներին և նրանց առաջնորդներին ԱԱԾ-ի նկուղով։

Դահլիճում իրավիճակը շիկացավ։ Քոչարյանի դաշինքի պատգամավորները նույնպես անցան փողոցային բառապաշարի։ Երկար վեճից հետո ԱԺ նախագահ Ալեն Սիմոնյանի հրահանգով դադարեցվեց ուղիղ եթերը։ Դրանից հետո «news.am»-ի լրագրողը ֆիքսել էր, թե ինչպես է Փաշինյանը վեր կենում տեղից, բղավելով գնում դեպի դահլիճի կենտրոնը։ Արդարադատության նախարար Սրբուհի Գալյանը փորձում էր հանդարտեցնել հունից դուրս եկած վարչապետին։

Հրապարակված կադրերում երևում է, թե ինչպես է Փաշինյանը ընդդիմադիրներին   ժեստ անում, որը մեկնաբանվում էր որպես «վիզ կտրել»։ Չնայած դրան՝ Ալեն Սիմոնյանն այսօր ասաց՝ չի կարծում, որ վարչապետը պետք է ներողություն խնդրի, իսկ ժեստ մեկնաբանեց որպես՝ «ստեղ եք հասցրել»։

Ի դեպ, ավելի վաղ  «Օպել»-ի վարորդներին «համբալ» էր կոչել   Երևանի քաղաքապետ Տիգրան Ավինյանի հայրը։ Ավինյանը ներողություն խնդրեց, իսկ Փաշինյանը ոչ միայն չարձագանքեց այդ վիրավորանքին, այլև հիմա արդեն ինքն է նման բառապաշար կիրառում։

Երեկվա միջադեպից հետո ԱԺ նախագահը տեսանյութ էր տարածել՝ սպառնալով կարգապահական միջոցներով։ Քոչարյանի թիմակիցներն այժմ փորձում են Փաշինյանի պահվածքին իրավական գնահատականի հասնել։

Սա ԱԺ-ում լեզվակռվի վերածված առաջին դեպքը չէ։ 8-րդ գումարման խորհրդարանում նման դեպքերը հաճախակի են․ ընդամենը երկու շաբաթ առաջ ծեծկռտուք սկսվեց ցեղասպանությունը և Արարատը ուրանալու մեղադրանքների ֆոնին։  Այս գումարման խորհրդարանում լեզվակռիվը, հրմշտոցը և անգամ շշամարտը դարձել են սովորական։ Հարցերը հաճախ լուծվում են «ռազբորկաների» միջոցով։

Իսկ երբեմնի ընդդիմադիր Փաշինյանն ասում էր․ «Ես ուզում եմ հիանալ մեր երկրի նախագահով, վարչապետով, ԱԺ նախագահով»։ Սակայն այսօր նրա բառապաշարն ու վարքագիծը սուր հակասության մեջ են իր իսկ երբեմնի պատկերացրած վարչապետի կերպարի հետ։

Նարեկ Կիրակոսյան