29.04.2026 | 23:06
Վանաձորում կանխվել է սպանության փորձ, ձերբակալվել է զինված խումբ. ՆԳՆ
Ռուսաստանը «չափազանց շատ բան է պահանջում» Ուկրաինայի հետ պատերազմը դադարեցնելու համար. ԱՄՆ փոխնախագահ
Քաղաքականություն
07.05.2025 | 22:27
ԱՄՆ փոխնախագահ Ջեյ Դի Վենսը հայտարարել է, որ Ռուսաստանը «չափազանց շատ բան է պահանջում» Ուկրաինայի հետ պատերազմը դադարեցնելու համար, ինչն ընդգծում է Սպիտակ տան նոր հիասթափությունը՝ կապված Մոսկվային խաղաղության բանակցություններում ներգրավելու ջանքերի հետ, գրում է Politico-ն։
Վաշինգտոնում Մյունխենի առաջնորդների հանդիպման ժամանակ ունեցած ելույթում Վենսը նշել է, որ ԱՄՆ-ը կենտրոնանում է երկարաժամկետ կարգավորման վրա, քանի որ Ռուսաստանը մերժել է ԱՄՆ-ի 30-օրյա հրադադարի կոչը: Մոսկվան հայտարարել է, որ նման ժամանակավոր դադարը չի համապատասխանում իր ռազմավարական շահերին, քանի որ այն թույլ կտա Ուկրաինային վերախմբավորվել:
ԱՄՆ փոխնախագահը, միաժամանակ, ընդգծել է, որ Ռուսաստանը, հավանաբար, ստիպված կլինի զիջումների գնալ, ինչը նշան է, որ Թրամփի վարչակազմը պատրաստ է ավելի ագրեսիվ լինել Ռուսաստանի նախագահ Վլադիմիր Պուտինի նկատմամբ։
«Ռուսները ներկայացնում են որոշակի պահանջներ, խնդրում են որոշակի զիջումներ՝ հակամարտությունը դադարեցնելու համար։ Մենք կարծում ենք, որ նրանք չափազանց շատ բան են պահանջում»,- նշել է Վենսը։
Նա ասել է, որ հաջորդ քայլը Ուկրաինային և Ռուսաստանին համոզելն է՝ խոսել միմյանց հետ։
«Մենք կցանկանայինք, որ և՛ ռուսները, և՛ ուկրաինացիներն իրականում համաձայնության գային որոշ հիմնական սկզբունքների շուրջ՝ նստելու և միմյանց հետ խոսելու համար։ Սա հաջորդ մեծ քայլն է, որը մենք կցանկանայինք անել»,- ասել է ԱՄՆ փոխնախագահը։
Հավելենք, որ ԱՄՆ Պետքարտուղարությունը բազմիցս ընդգծել է, որ խաղաղության գործընթացին հետագա մասնակցությունը կախված է Կիևի և Մոսկվայի կառուցողական դիրքորոշումներից։ Պետդեպի խոսնակ Թեմի Բրյուսը նշել էր, որ եթե առաջընթաց չլինի, Միացյալ Նահանգները կարող է հրաժարվել բանակցություններում միջնորդի դերից։
Թարգմանությունը՝ Էմմա Չոբանյանի
