Քաղաքականություն
07.05.2025 | 18:25
Ֆրանսիայի նախագահ Էմանուել Մակրոնը և Գերմանիայի նորընտիր կանցլեր Ֆրիդրիխ Մերցն այսօր խոստացել են ակտիվացնել պաշտպանական համագործակցությունը Գերմանիայի նոր ղեկավարի՝ առաջին արտասահմանյան այցի շրջանակում Փարիզում հանդիպմանը, գրում է AFP-ը։
Եվրոպան ձգտում է ամրապնդել իր պաշտպանությունը՝ Ուկրաինայի դեմ Ռուսաստանի պատերազմի և Դոնալդ Թրամփի նախագահության շրջանում Եվրոպայի նկատմամբ ԱՄՆ անվտանգության պարտավորությունների վերաբերյալ կասկածների ֆոնին։
«Մենք կստեղծենք ֆրանս-գերմանական պաշտպանության և անվտանգության խորհուրդ, որը պարբերաբար կհանդիպի՝ մեր ընդհանուր ռազմավարական մարտահրավերներին օպերատիվ պատասխաններ տալու համար»,- համատեղ մամուլի ասուլիսում ասել է Մակրոնը։
Մայիսի 6-ին կանցլեր ընտրված Մերցը Եվրոպայի, տրանսատլանտյան քաղաքականության կողմնակից և Ուկրաինայի կողմնակից է, որը խոստացել է վերականգնել Գերմանիայի դերը համաշխարհային ասպարեզում։
«Մենք համատեղ միջոցներ կձեռնարկենք Եվրոպայի անվտանգության և պաշտպանական կարողությունների հետագա բարձրացման համար»,- ասել է Մերցը։
Ֆրանսիան և Մեծ Բրիտանիան գլխավորում են 30 երկրներից կազմված «կամավորների կոալիցիայի» շրջանակում քննարկումները՝ Ուկրաինայում ցանկացած հրադադար ապահովելու համար զորքերի հնարավոր տեղակայման վերաբերյալ։
Հարցին՝ ինչպե՞ս կարող է Գերմանիան փորձել ազդել Ուկրաինայի պատերազմում հնարավոր խաղաղության համաձայնագրի շուրջ բանակցությունների վրա, Մերցը պատասխանել է, որ Բեռլինի՝ Ֆրանսիայի և Մեծ Բրիտանիայի հետ համագործակցության «ապացուցված ձևաչափ» կա։
Մերցը հայտարարել է, որ «ինտենսիվ խորհրդակցություններ» կանցկացնի Ֆրանսիայի և Մեծ Բրիտանիայի հետ՝ հավելելով, որ «եթե կարողանան ներառել լեհերին, ավելի լավ կլինի»։
Թարգմանությունը՝ Էմմա Չոբանյանի
