08.10.2026 | 12:17
Աշխարհի ու Եվրոպայի չեմպիոն Դավիդ Սիլվան 40 տարեկանում վերսկել է կարիերան
ԱՄՆ-ի և Իրանի միջև բանակցությունների հաջորդ փուլը կարող է տեղի ունենալ մայիսի 10-11-ը
Քաղաքականություն
06.05.2025 | 13:36
ԱՄՆ-ի և Իրանի միջև միջուկային գործարքի շուրջ բանակցությունների հաջորդ փուլը կարող է տեղի ունենալ մայիսի 10-11-ին։ X սոցիալական ցանցում այս մասին հայտնել է Axios-ի թղթակից Բարաք Ռավիդը՝ վկայակոչելով ԱՄՆ նախագահի հատուկ բանագնաց Սթիվ Ուիթկոֆին, փոխանցում է РБК-ն։
«Ուիթկոֆն ինձ ասաց, որ ԱՄՆ-ը ջանքեր է գործադրում՝ այս շաբաթվա վերջին Իրանի հետ միջուկային բանակցությունների չորրորդ փուլն անցկացնելու համար»,- ասվում է հաղորդագրության մեջ:
Ուիթկոֆը հավելել է, որ «եթե այդ բանակցությունները տեղի չունենան, ապա միայն ԱՄՆ նախագահ Դոնալդ Թրամփի Մերձավոր Արևելք այցի պատճառով»:
Ըստ Ռավիդի՝ Ուիթկոֆը դրական է գնահատել միջուկային գործարքի վերաբերյալ բանակցությունները: Նրա խոսքով՝ կողմերը հասնում են «որոշակի առաջընթացի»: Ուիթկոֆը նշել է՝ ԱՄՆ նախագահը ցանկանում է, որ «այս հարցը լուծվի դիվանագիտական ճանապարհով»:
Հիշեցնենք, որ ԱՄՆ-ը և Իրանը քննարկում են Իսլամական Հանրապետության միջուկային ծրագիրը: Երկրորդ անգամ ԱՄՆ նախագահի պաշտոնում վերընտրվելուց հետո Դոնալդ Թրամփը հայտարարել է նոր միջուկային գործարք կնքելու նպատակի մասին: Մարտի վերջին նա սպառնացել էր ռազմական հարվածով և մաքսատուրքերի կիրառմամբ, եթե Թեհրանը երկու ամսվա ընթացքում չգնա գործարքի:
ԱՄՆ-ի և Իրանի միջև արդեն անցկացվել են անուղղակի բանակցությունների երեք փուլեր Օմանի միջնորդությամբ: Առաջինը տեղի է ունեցել ապրիլի 12-ին Մասկատում, երկրորդը՝ ապրիլի 19-ին Հռոմում, երրորդը՝ ապրիլի 26-ին՝ դարձյալ Մասկատում:
The Times of Israel-ի պարզել է, որ ապրիլի 26-ին կողմերը քննարկել են որոշ հարցեր, սակայն որևէ համաձայնության չեն հասել: The Wall Street Journal-ի տեղեկություններով էլ՝ գլխավոր խոչընդոտը Թեհրանի համար ուրանի հարստացումը շարունակելու հնարավորությունն է:
