29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Թրամփը հայտնել է, որ «շատ լավ և արդյունավետ» հեռախոսազրույց է ունեցել Էրդողանի հետ
Քաղաքականություն
05.05.2025 | 21:42
Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել ԱՄՆ նախագահ Դոնալդ Թրամփի հետ։ Թուրքական կողմի հաղորդմամբ՝ Էրդողանը հայտարարել է, որ Անկարան շարունակելու է քայլեր ձեռնարկել Վաշինգտոնի հետ համագործակցությունը բազմաթիվ, մասնավորապես, պաշտպանական արդյունաբերության ոլորտում առաջ մղելու համար։
Նա նշել է, որ աջակցում է ԱՄՆ նախագահ Թրամփի՝ պատերազմները դադարեցնելու մոտեցմանը, և որ գնահատում է Իրանի հետ բանակցային գործընթացն ու Ռուսաստան-Ուկրաինա պատերազմը դադարեցնելու ուղղությամբ ձեռնարկված ջանքերը։ Էրդողանը նաև հայտարարել է, որ Գազայում մարդասիրական ճգնաժամը հասել է լուրջ չափերի, որ մարդասիրական օգնությունը պետք է անխափան մատակարարվի Գազա, և որ Թուրքիան պատրաստ է համագործակցել և ամեն տեսակի աջակցություն ցուցաբերել հրադադարի հաստատման ու երկարատև խաղաղություն ապահովելու համար։
Թուրքիայի նախագահն ասել է, որ Անկարան ջանքեր է գործադրում Սիրիայի տարածքային ամբողջականությունը պաշտպանելու և կայունությունն ապահովելու համար, որ ԱՄՆ-ի ջանքերը՝ Սիրիայի նկատմամբ պատժամիջոցները մեղմելու ուղղությամբ, կնպաստեն գործընթացին, և որ կայուն Սիրիան կնպաստի ինչպես տարածաշրջանային, այնպես էլ համաշխարհային խաղաղությանը։
Էրդողանը նաև ԱՄՆ նախագահ Դոնալդ Թրամփին հրավիրել է Թուրքիա։
Թրամփն իր հերթին հայտնել է, որ «շատ լավ և արդյունավետ հեռախոսազրույց է ունեցել Թուրքիայի նախագահ Ռեջեփ Էրդողանի հետ բազմաթիվ թեմաների շուրջ, այդ թվում՝ Ռուսաստանի/Ուկրաինայի հետ պատերազմի, Սիրիայի, Գազայի և այլնի վերաբերյալ» ։
«Նախագահը հրավիրել է ինձ ապագայում գնալ Թուրքիա, և նա նույնպես կգա Վաշինգտոն։ Նախագահի պաշտոնում իմ չորս տարիների ընթացքում իմ հարաբերությունները նախագահ Էրդողանի հետ հիանալի էին։ Մենք սերտորեն համագործակցել ենք բազմաթիվ հարցերի շուրջ, այդ թվում՝ այն փաստի, որ նա օգնել է բանտարկված հոգևորական Էնդրյու Բրանսոնին վերադարձնել Միացյալ Նահանգներ՝ իմ անմիջական խնդրանքով»,- գրել է Թրամփը Truth Social-ում։
Նա նշել է, որ անհամբեր սպասում է նախագահ Էրդողանի հետ աշխատելուն՝ Ռուսաստանի և Ուկրաինայի միջև «հիմար և մահացու պատերազմը ՀԻՄԱ դադարեցնելու համար»։
Հիշեցնենք՝ օրերս Էրդողանը հայտարարել էր, որ առաջին իսկ հնարավորության դեպքում դեմ առ դեմ կհանդիպի Դոնալդ Թրամփի հետ։ Նա հայտնել էր, որ ամերիկյան և թուրքական կողմերն աշխատում են հանդիպումը կազմակերպելու ուղղությամբ։
Թարգմանությունը՝ Էմմա Չոբանյանի
