Կոլիզեումը նույնպես այսօր ֆունկցիոնալ չէ, ինչ է՝ պետք է քանդվի՞. ապաքաղաքական զրույց Արաքսյա Մուշեղյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է կոմպոզիտոր, դաշնակահարուհի և պրոդյուսեր Արաքսյա Մուշեղյանը: Նրա կարծիքով՝ պրոդյուսերի պարտականությունը ոչ թե «աստղեր պատրաստելն է», այլ տաղանդավոր մարդկանց հայտնաբերելն ու նրանց ունակությունները լավագույնս կիրառելը: Ընդ որում, եթե խոսքը կատարողների մասին է, ապա նրանց պետք է ուղղորդել դեպի կոմպոզիտորական տեքստի խորը ընկալում:

Ճարտարապետության մեջ 1960-70-ականների հայկական «մոդեռնիզմով» հիանում է ամբողջ աշխարհը, սակայն Հայաստանում այդ կոթողների նկատմամբ պատշաճ ուշադրություն չի դարձվում: Որպես հիմնավորում՝ հաճախ բերվում է այն հանգամանքը, որ այդ շինությունները (այդ թվում՝ «Հրազդան» մարզադաշտը, որի ճարտարապետն է երաժշտի հայրը՝ Գուրգեն Մուշեղյանը) «ֆունկցիոնալ չեն», չեն համապատասխանում ժամանակակից ստանդարտներին: Այդ փաստարկին ի պատասխան՝ հաղորդման հյուրը հիշեցնում է, որ Հռոմի Կոլիզեումը նույնպես ֆունկցիոնալ չէ, բայց ոչ ոքի մտքով չի անցնում այն քանդել: Այլ հարց է, որ Հայաստանում «մոդեռնիստական» կոթողների դեպքում պետք է ի հայտ գան մարդիկ, որոնք կկարողանան գտնել այդ կառույցներն «աշխատեցնելու» լավագույն ձևերը:

Ըստ Արաքսյա Մուշեղյանի՝ նույնիսկ այն դեպքում, երբ արվեստագետը ստեղծագործում է պատվերով, նա պետք է մնա իր մասնագիտական սկզբունքների շրջանակներում և չենթարկվի պատվիրատուի չհիմնավորված պահանջներին:

«Առանց սկզբունքի արվեստագետը դառնում է պարզապես քմահաճույքներ կատարող»,- ասում է հաղորդման հյուրը:

Մանրամասները՝ տեսանյութում:

Արամ Աբրահամյան