29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Թրամփը չօգտագործեց Ցեղասպանություն բառը Ապրիլի 24-ի իր ուղերձում
Քաղաքականություն
24.04.2025 | 21:28
Սպիտակ տունը հայտարարություն է տարածել Հայոց ցեղասպանության 110-րդ տարելիցի կապակցությամբ՝ նշելով, որ այսօր հիշում են Մեծ Եղեռնը և ոգեկոչում այն հրաշալի մարդկանց հիշատակը, որոնք տուժել են 20-րդ դարի ամենասարսափելի աղետներից մեկի ժամանակ:
«1915 թվականից սկսած, Օսմանյան կայսրության գոյության վերջին տարիներին, մեկուկես միլիոն հայեր աքսորվեցին և ուղարկվեցին մահվան։ Հիշատակի այս օրը մենք կրկին միանում ենք Ամերիկայի և ամբողջ աշխարհի հայ մեծաթիվ համայնքին, որը սգում է բազմաթիվ զոհերի համար:
Ամեն տարի ապրիլի 24-ին մենք անդրադառնում ենք ամերիկացի և հայ ժողովուրդների ամուր ու հարատև կապերին։ Մենք հպարտ ենք Հայկական և սիրիական օգնության ամերիկյան կոմիտեով, որը հիմնադրվել է 1915 թվականին, որը կարևոր մարդասիրական աջակցություն է տրամադրել հայ փախստականներին, և երախտապարտ ենք հազարավոր ամերիկացիների, որոնք ներդրում են ունեցել կամ կամավոր օգնել են իրենց տներից վտարված հայերին:
Այս օրը մենք վկայում ենք ողբերգության դեմ հայ ժողովրդի ուժի և տոկունության մասին: Մեր բախտը բերել է, որ այդքան շատ հայեր իրենց հարուստ մշակույթը բերել են մեր ափեր և մեծ ներդրում ունեցել մեր երկրի զարգացման գործում, այդ թվում` պարգևատրված զինվորներ, էստրադայի հայտնի արտիստներ, հայտնի ճարտարապետներ և հաջողակ գործարարներ:
Հարգանքի տուրք մատուցելով զոհվածների հիշատակին՝ իմ վարչակազմը շարունակում է հավատարիմ մնալ կրոնի ազատության ապահովմանը և խոցելի փոքրամասնությունների պաշտպանությանը: Մենք ակնկալում ենք շարունակել Հայաստանի հետ մեր ռազմավարական գործընկերությունը և պահպանել կայունությունը տարածաշրջանում, քանի որ մենք շարունակում ենք ձգտել կայուն բարգավաճման և անվտանգության»,- մասնավորապես, ասվում է Թրամփի ուղերձում:
Հատկանշական է, որ Թրամփը չի օգտագործել Ցեղասպանություն բառը Ապրիլի 24-ի իր ուղերձում, մինչդեռ Միացյալ Նահանգների նախկին նախագահ Ջո Բայդենն ապրիլի 24-ին հայ ժողովրդին հղված ուղերձում պաշտոնապես ճանաչել էր Հայոց ցեղասպանությունը: Բայդենն իր ուղերձում օգտագործել էր «Ցեղասպանություն» եզրույթը:
