18.05.2026 | 16:20
Գոռ Մինասյանը՝ ծանրամարտի Ասիայի եռակի չեմպիոն․ ՏԵՍԱՆՅՈՒԹ
Հախճապակե զուգարանակոնքեր՝ պատգամավորների համար. ԱԺ-ն Մհեր Սեդրակյանի ՍՊԸ-ին 53 մլն դրամ է վճարել
Տնտեսություն
05.10.2018 | 15:44
6-րդ գումարման Ազգային ժողովի լուծարման շուրջ ծավալվող կրքերին զուգահեռ խորհրդարանում ակտիվ շինարարական աշխատանքներ են իրականացվում, որոնց համար ԱԺ աշխատակազմը ծախսում է միլիոնավոր դրամներ։ 2018 թվականի հուլիսի 18-ից Ազգային ժողովում մինչև այսօր շարունակվում են 24 սանհանգույցների նորոգման աշխատանքները: Խորհրդարանն այս աշխատանքների իրականացման համար կառույցի բյուջեից վճարել է 53 մլն դրամ, որը համարժեք է 110 հազար ԱՄՆ դոլարի: Այս մասին տեղեկացանք Ազգային ժողովի հասարակայնության և լրատվության հետ կապերի վարչությունից՝ մեր գրավոր հարցմանն ի պատասխան:
Պարզեցինք, ոչ Ազգային ժողովի աշխատակազմը հարկատուների հաշվին որոշել է լյուքս զուգարաններ ապահովել պատգամավորների համար: Այսպես․ կառույցը ձեռք է բերել հախճապակե 30 զուգարանակոնք 2 մլն 250 հազար դրամով, սենսորային 24 ծորակ՝ 2 մլն դրամով, ձեռքի չորացնող 24 ապարատ՝ 5 մլն 700 հազար դրամով, իսկ սանհանգույցների պատուհաններն արժեցել են 4 մլն 500 դրամ:
Այս աշխատանքները կատարելու նպատակով հայտարարված մրցույթի համար հայտ է ներկայացրել 11 կազմակերպություն: Սակայն ԱԺ-ն պայմանագիր է կնքել «Բիդեք» ՍՊԸ-ի հետ: Սա պատահական կազմակերպություն չէ: Այն պատկանում է Ազգային ժողովի նախկին պատգամավոր, բազմաթիվ սկանդալային պատմությունների հետևում կանգնած Մհեր Սեդրակայանին:
Այս տեղեկությունը մեզ հետ զրույցում ոչ պաշտոնապես հաստատեցին նաև ԱԺ-ում աշխատող ՍՊԸ-ի մի քանի բանվորներ: Էլեկտրոնային ռեգիտսրի կայքում որպես «Բիդեք» ՍՊԸ-ի հիմնադիր նշված է Գառնիկ Ավետիսյանի անունը: Նա մեր աղբյուրների փոխանցմամբ՝ Մհեր Սեդրակյանի ընկերն է: Ի դեպ, ՍՊԸ-ի գտնվելու վայրը «Սփյուռ» տեղեկատվական համակարգի համաձայն Էրեբունի վարչական շրջանում է, որտեղ նախկին իշխանությունների օրոք իրեն տեր-տիրական էր զգում Սեդրակյանը։
Մամուլի արխիվներից պարզ է դառնում, որ «Բիդեք» ՍՊԸ-ն 2015 թվականին 83 մլն-ի շրջանակներում մեկ այլ կազմակերպության հետ ևս ԱԺ-ում վերանորոգման աշխատանքներ է իրականացրել: http://hetq.am/arm/news/60245/azgayin-zhoxovi-ashkhatakazmy-khusapum-e-pataskhanel-gnumnerin-veraberox-harcerin.html։ «Բիդեք» ՍՊԸ-ն մոտ 200 մլն դրամով վանդակներ է կառուցել նաև Երևանի կենդանաբանական այգում:
«Բիդեք» ՍՊԸ-ի հետ կնքված պայմանագրի համաձայն Ազգային ժողովում սանհանգույցենրի վերանորոգման վերջնական աշխատանքները պետք է ավարտվեին սեպտեմբերի 19-ին: Սական դրանք դեռ շարունակվում են: file:///C:/Users/User/Downloads/0000540.pdf Սա ժամկետների խախտում է, և ըստ պայմանագրի, ԱԺ-ն կարող է յուրաքանչյուր ուշացված օրվա համար վճարվելիք գումարից պահել զրո ամբողջ հինգ հարյուրերոդականի չափով:
Սանհանգույցների կապիտալ վերանորոգմանը զուգահեռ ընթանում են նաև Ազգային ժողովի թանգարան-գրադարանի նորոգման աշխատանքները: Շինարարություն իրականացնելու համար մրցույթին մասնակցել է 19 կազմակերպություն, արդյունքում կնքվել է պայմանագիր «Կարպ-Գազ-Ռադ» ՍՊԸ-ի հետ՝ 6 720 000 ՀՀ դրամի շրջանակում:
6 մլն ՀՀ դրամի շրջանակում էլ «Աբակ» ՍՊԸ-ն ՀՀ Ազգային ժողովի վարչական շենքում մամուլի կենտրոնի նորոգման աշխատանքներ է իրականացրել: Նույն ՍՊԸ-ն 5 մլն 436 դրամի շրջանակներում վերանորոգում է նաև ԱԺ-ի միջանցքները:
Ազգային ժողովի աշխատակազմի հասարակայնության և լրատվության վարչությունից մեր գրավոր հարցմանն ի պատասխան նշել էին, որ վերանորգման աշխատանքների հետ կապված առանձին շինանյութեր ձեռք չեն բերվել, դրանք մտնում են աշխատանքների կատարման համար հատկացված գումարի մեջ:
Ի դեպ, այս կապիտալ վերանորոգումների համատեքստում էլ նշենք, որ Ազգային ժողովն ամռան ամիսներին նոր ուղեգորգ էր ձեռք բերել: Մեկ ուղեգորգն արժեցել էր 5 մլն 100 հազար դրամ:
Անի Սահակյան
