Քաղաքականություն
23.04.2025 | 18:09
Ադրբեջանական ԱՊԱ գործակալության թղթակիցը Ստամբուլից հայտնում է, որ ավելի քան 150 մարդ դուրս է նետվել Ստամբուլի շենքերից երկրաշարժի ժամանակ: Տեղեկությունը հայտնել են Ստամբուլի քաղաքապետարանից:
Հաղորդվում է, որ երկրաշարժի պահին 151 մարդ վնասվածքներ է ստացել՝ դուրս նետվելով շենքերի բարձրությունից։ Նրանք բուժում են ստանում հիվանդանոցներում, նրանց կյանքին վտանգ չի սպառնում։ Լրատվականները հաղորդում են, որ Ստամբուլի երկրաշարժերի հետևանքով զոհեր չկան։
Ի դեպ, Ստամբուլի տեխնիկական համալսարանի պրոֆեսոր Զիյադին Չաքըրը հայտարարել է, որ այսօր տեղի ունեցած 6.2 մագնիտուդով երկրաշարժը Մարմարա ծովի ճեղքվածքի վրա զգալի լարում է առաջացրել։ Ըստ ռուսալեզու «Թուրքիայի օրակարգը» տելեգրամ ալիքի, գիտնականի խոսքերով, դա կարող է արագացնել կանխատեսվող ավերիչ երկրաշարժը Ստամբուլում, թեև դրա ճշգրիտ ժամկետը կանխատեսելը հնարավոր չէ։
Չաքըրն ընդգծել է, որ այսօրվա երկրաշարժը ազդել է ճեղքվածքի միայն մի փոքր հատվածի վրա՝ մոտ 15-20 կմ, այն դեպքում երբ հիմնական մասը, որը չի վնասվել 1766 թվականից ի վեր, ավելի քան 70 կմ է։
Գիտնականը նաև չի բացառել հզոր հետցնցումները, ուստի բնակիչներին խորհուրդ է տրվում խուսափել վնասված շենքերից։
