17.07.2026 | 16:10
Մոսկվան և Բաքուն շարժվում են դեպի դաշնակցային համագործակցության ներուժի լիարժեք բացահայտում. Լավրով
Հուսով եմ՝ Ռուսաստանն ու Ուկրաինան այս շաբաթ գործարք կկնքեն․ Թրամփ
Քաղաքականություն
21.04.2025 | 10:46
ԱՄՆ նախագահ Դոնալդ Թրամփը հույս է հայտնել, որ Ռուսաստանը և Ուկրաինան այս շաբաթ գործարք կկնքեն։ Այս մասին նա գրել է իր Truth Social սոցիալական ցանցում։
«Հուսով եմ՝ Ռուսաստանն ու Ուկրաինան այս շաբաթ գործարք կկնքեն։ Երկուսն էլ կսկսեն դրանից հետո մեծ բիզնես անել Միացյալ Նահանգների հետ և հարստություն կստեղծեն»,- նշել է Թրամփը։
Նա չի մանրամասնել, թե ինչ գործարքի մասին է խոսքը։ Մոսկվան և Կիևը դեռևս չեն մեկնաբանել ԱՄՆ նախագահի հայտարարությունը։
Ավելի վաղ ԱՄՆ պետքարտուղար Մարկո Ռուբիոն հայտարարել էր, որ Վաշինգտոնը մի քանի օրվա ընթացքում կդադարեցնի Ռուսաստանի և Ուկրաինայի միջև խաղաղության համաձայնագրի հասնելու միջնորդական ջանքերը, եթե չտեսնի համաձայնության հասնելու հստակ նշաններ։
Axios-ի տվյալներով՝ Թրամփը Ռուբիոյի, հատուկ ներկայացուցիչ Սթիվ Ուիթկոֆի և մի քանի այլ կարևոր խորհրդականների հետ զրույցում չէր բացառել, որ Միացյալ Նահանգները կարող է դուրս գալ Ուկրաինայի հարցով բանակցություններից, եթե առաջընթաց չգրանցվի։ Հրապարակավ ԱՄՆ նախագահը հայտարարել է, որ կարծում է՝ և՛ Ռուսաստանը, և՛ Ուկրաինան «ցանկանում են ավարտել» պատերազմը։
Bloomberg-ն էլ գրել էր, որ ապրիլի 17-ին Փարիզում Միացյալ Նահանգներն իր եվրոպացի դաշնակիցներին ներկայացրել է Ուկրաինայում «ամուր և երկարատև խաղաղության ուրվագծերը»։ Այն նախատեսում է Ռուսաստանի վերահսկողության պահպանում Ուկրաինայի արդեն իսկ գրավված տարածքների նկատմամբ, ինչպես նաև ՌԴ-ի նկատմամբ պատժամիջոցների աստիճանական վերացում՝ երկարաժամկետ հրադադարի դեպքում։ Հաղորդվում է, որ երկարաժամկետ խաղաղության համաձայնագրի վերջնական տարբերակը նախատեսվում է ներկայացնել այս շաբաթ Լոնդոնում նախանշված հանդիպմանը։
Թարգմանությունը՝ Էմմա Չոբանյանի
