09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Նեթանյահուի գրասենյակը մանրամասներ է հայտնել Ադրբեջանում կայացած Իսրայել-Թուրքիա հանդիպումից
Քաղաքականություն
10.04.2025 | 23:14
Այն բանից հետո, երբ իսրայելցի և թուրք անանուն պաշտոնյաները հաստատել էին երկու երկրների միջև Ադրբեջանում Սիրիայի հարցով տեղի ունեցած ուղիղ բանակցությունների մասին, Իսրայելի վարչապետ Բենիամին Նեթանյահուի գրասենյակը մանրամասներ է հրապարակել ընթացիկ քննարկումների մասին։ The Times of Israel-ի հաղորդմամբ՝ երեկ երեկոյան Իսրայելի ազգային անվտանգության խորհրդական Ցախի Հանեգբիի գլխավորած պատվիրակությունն Ադրբեջանում հանդիպել է իր թուրք գործընկերների հետ։ Իսրայելի պատվիրակության կազմում են եղել Պաշտպանության նախարարության և անվտանգության գործակալության բարձրաստիճան պաշտոնյաներ։
Նեթանյահուի գրասենյակը շնորհակալություն է հայտնել Ադրբեջանի նախագահ Իլհամ Ալիևին բանակցությունները հյուրընկալելու համար։
«Բանակցությունների ընթացքում յուրաքանչյուր կողմ ներկայացրել է իր շահերը տարածաշրջանում, և նրանք համաձայնել են շարունակել հաղորդակցության ուղին՝ անվտանգության կայունությունը պահպանելու համար»,- ասվում է հայտարարության մեջ։
Հիշեցնենք, որ Թուրքիայի ՊՆ աղբյուրն ավելի վաղ հայտնել էր, որ Իսրայելի և Թուրքիայի ներկայացուցիչները երեկ Ադրբեջանում հանդիպում են անցկացրել։
Թուրքիան փորձում է ընդլայնված ռազմական ներկայություն հաստատել Սիրիայում Բաշար Ասադի տապալումից ի վեր։ Իսրայելը ռազմական հարվածներ է հասցնում այն բազաների դեմ, որոնք, իր կարծիքով, Թուրքիան ցանկանում է վերահսկել։
Թարգմանությունը՝ Էմմա Չոբանյանի
