Ինչու է Թուրքիայի ՆԳՆ-ն շնորհակալություն հայտնել հայ պաշտոնյային․Դադունցը մանրամասներ է ներկայացնում․ ՏԵՍԱՆՅՈՒԹ

Այս տարվա հունվարին Թուրքիայի ՆԳՆ-ն հատուկ շնորհակալություն էր հայտնել ՀՀ արդարադատության փոխնախարար Տիգրան Դադունցին այն բանից հետո, երբ Թուրքիայում երկար տարիներ հետախուզման մեջ գտնվող հանցավոր խմբավորման պարագլուխներին Երևանը հանձնեց Անկարային։

Հիշեցնենք՝ Թուրքիայի ՆԳՆ նախարարությունը հայտարարություն է տարածել X սոցիալակական ցանցում, որտեղ հայտնել է, որ Հայաստանի հետ համագործակցության արդյունքում Հայաստանում ձերբակալվել եւ Թուրքիային են արտահանձնվել 6 տարի եւ 15 տարի հետախուզման մեջ գտնվող Իբրահիմ Քայմաքը եւ Էրջան Յըլմազը։
Հայտարարության մեջ Օրդուի ոստիկանության նահանգային վարչության հետ համագործակցության համար շնորհակալություն են հայտնել Հայաստանի Արդարադատության փոխնախարար Տիգրան Դադունցին։

Կառավարության նիստից հետո Factor.am-ին փոխնախարարից հետաքրքրվեց՝ ի՞նչ մասնակցություն էր ունեցել գործընթացին, որ արժանացել էր Թուրքիայի շնորհակալությանը։

«Շնորհակալություն այս հարցի համար, որովհետեև այն հնարավորություն է տալիս պարզաբանել, թե ինչ է տեղի ունեցել․ սովորական գործընթաց է տեղի ունեցել։ Այն քաղաքացիները, որոնք հանձնվել են ՀՀ-ում դատապարտված են եղել պատժի և պատժի ժամկետը լրացել է, փոխանցվել են Թուրքիայի Հանրապետություն, քանի որ այնտեղ ևս հարուցված էր քրեական գործ»,-ասաց փոխնախարար Տիգրան Դադունցը։

Հարցին, թե ո՞րն է եղել իր մասնակցությունը և ի՞նչ խողովակներով է բանակացել Թուրքիայի պաշտոնյաների հետ, ասաց․ «Գործընթացը եղել է միջազգային կոնվենցիաների շրջանակներում և զբաղվել է մեր նախարարության համապատասխան վարչությունը՝ ՀՀ ԱԳՆ-ի միջոցով։ Գիտեք, որ մենք դիվանագիտական հարաբերություններ չունենք, օգտագործել ենք ԱԳՆ-ի խողովակները, գրագրություն է եղել»։
Մանրամասները՝ տեսանյութում։

Նարեկ Կիրակոսյան