20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
ԱՄՆ հետախուզությունը կարծում է, որ Կուրսկի շրջանում ուկրաինական զորքերի շրջափակում չկա
Քաղաքականություն
20.03.2025 | 22:41
ԱՄՆ և ՌԴ նախագահներ Դոնալդ Թրամփը և Վլադիմիր Պուտինը վերջին օրերին մի քանի անգամ հայտարարել են, որ ուկրաինական զորքերը Կուրսկի շրջանում, իբր, շրջապատված են։ Ոչ միայն Կիևը, այլև շատ անկախ վերլուծաբաններ, սակայն, պնդում են, որ դա այդպես չէ։
ԱՄՆ մի քանի հետախուզական գործակալություններ, այդ թվում՝ ԿՀՎ-ն, հանգել են եզրակացության, որ ուկրաինական բանակը նահանջում է Կուրսկի շրջանից, բայց ընդհանրապես շրջապատված չէ, Reuters-ին հայտնել են երեք ամերիկյան և մեկ եվրոպական անանուն աղբյուրներ, փոխանցում է BBC-ի ռուսական ծառայությունը։
Նրանցից երկուսն ասել են, որ վերջին շաբաթվա ընթացքում հետախուզական տվյալներով կիսվել են Սպիտակ տան հետ:
Մարտի 13-ին Պուտինը հայտարարել էր, որ ուկրաինական զորքերը Կուրսկի շրջանում ունեն «միայն երկու տարբերակ՝ հանձնվել կամ մահանալ»։ Հաջորդ օրը Թրամփը սոցցանցերում գրել էր, որ խնդրել է Պուտինին խնայել ուկրաինացի զինվորների կյանքը, ինչը մարտի 18-ին նրանց հեռախոսազրույցի թեմաներից մեկն էր: Թրամփը երկուշաբթի և երեքշաբթի նույնպես մի քանի անգամ կրկնել է Ուկրաինայի զինված ուժերի շրջափակման մասին իր պնդումները:
Ի պատասխան Reuters-ի հարցման՝ Սպիտակ տան Ազգային անվտանգության խորհուրդը մատնանշել է պետքարտուղար Մարկո Ռուբիոյի և ազգային անվտանգության հարցերով խորհրդական Մայքլ Ուոլցի երեկվա հայտարարությունը Վլադիմիր Զելենսկիի հետ Թրամփի զրույցի բովանդակության վերաբերյալ։ Դրանում նշվում է Կուրսկի շրջանում տիրող իրավիճակի մասին տեղեկությունները սերտորեն փոխանակելու համաձայնության մասին։
Սպիտակ տունը, ԿՀՎ-ն և Ազգային հետախուզության տնօրենի գրասենյակը հրաժարվել են լրատվամիջոցին մեկնաբանություններ տալ։
Թարգմանությունը՝ Էմմա Չոբանյանի
