Ինչպե՞ս պաշտպանել ընտանիքը բռնությունից․ կարծիքներ․ ՏԵՍԱՆՅՈՒԹ

ՀՀ աշխատանքի և սոցիալական հարցերի փոխնախարար Արսեն Մանուկյանն այն համոզմանն է, որ շատ հաճախ ընտանեկան բռությունը տեղի է ունենում այն պատճառով, որ ընտանիքում ապրում են ցածր գիտակցություն ունեցող  անդամներ, որի հետևանքով մարդիկ այնքան են բարոյազրկվում, որ կարող են ձեռք բարձրացնել կնոջ վրա և անգամ սպանել 1 տարեկան երեխայի:

Այս մասին այսօր «Ընտանեկան բռնություններ. ինչպե՞ս կանխել» թեմայով քննարկման ժամանակ ասաց փոխնախարարը՝ շեշտելով, որ նման դեպքերում իրավունքն անզոր է լուծելու ընտանեկան իրավահարաբերությունները, եթե աշխատանք  չի տարվում նեղ սոցիալական պայմանների և բարոյահոգեբանական վիճակի բարելավման ուղղությամբ։

Քննարկմանը մասնակցող «Կանանց աջակցման կենտրոնից» Հասմիկ Գևորգյանն էլ ասաց, որ ընտանեկան բռնության հիմնական պատճառն ուժն ու վերահսկողությունն են, և, ըստ կատարված հետազոտությունների,  մինչև 70 տոկոսով դրանք կարող են աճ արձանագրել։

«Պատերազմի գոտում գտնվող երկիր ենք, և հետազոտություններն ասում են, որ 70 տոկոսով կարող են բարձրանալ բռնության դեպքերը»,- ասաց նա՝ շեշտելով, որ բռնության դեպքերի կանխարգելման լավագույն եղանակներից է կոորդինացված աշխատանքը։ «Ընտանեկան բռնության մասին օրենքը նոր է մտել ուժի մեջ և նոր է սկսվել պետական համակարգի հետ աշխատանքն այս ոլորտում»,- ասաց նա։

Քննարկմանը մասնակից «Կանանց ռեսուրսային կենտրոնից» Աննա Հովհաննիսյանն էլ նկատեց, որ «Ընտանեկան բռնության մասին» օրենքում խնդիրներ կան՝  վերնագրից սկսած մինչև պաշտպանական մեխանիզմներ:

Մանրամասները՝ տեսանյութում։