26.10.2026 | 01:04
Մոտ 540 ձայնով պարտվել ենք Ստեփանավանում. ՔՊ-ական․ ՏԵՍԱՆՅՈւԹ
Օղակաձև զբոսայգին քանդեցին, ժողովրդին զրկեցին Գլխավոր պողոտայից, հիմա էլ հերթը Կասկադինն է. Ասլան Մխիթարյան․ ՏԵՍԱՆՅՈՒԹ
Քաղաքականություն
08.03.2025 | 19:00
«Քաղաքապետարանը պարզապես արհամարհեց Կասկադը նախագծողների մտահղացումը` Կասկադի արդիկանացման հարցում նախապատվությունը տալով ֆրանսիացի ճարտարապետին: Նախ` արտաքին տեսքը փոխելը դեռ արդիականացնել չէ: Երկրորդ` այդ նախագծով խզվում է Կասկադի և Արաբկիր վարչական շրջանի կապը: Վիլմոտի նախագիծը կիսում է Կասկադը, կործանում համալիրի գաղափարը, այն մեզ օտար է»,-Factor TV-ի հետ զրույցում նշում է Կասկադ համալիրի համահեղինակ ճարտարապետ Ասլան Մխիթարյանը:
Նա շեշտում է` արդիականացնել հարկավոր է տրանսպորտը, օրինակ` մետրոն. «6 տարում նոր կայարան սարքեիք, երկնաքերեր եք կառուցում, ծիծաղելի է: «Ումի՞ց ենք պակաս» մոտեցումն եք որդեգրել, բայց, օրինակ, Լիսաբոնի, Փարիզի նման քաղաքները հրաժարվեցին երկնաքերեր կառուցելու մտքից, իսկ մենք պետք է բերենք ու հենց քաղաքի կենտրոնում կառուցենք, չտեսությո´ւն է»:
Երևանի նախկին գլխավոր ճարտարապետը հարցնում է` այսքան շենք մայրաքաղաքում ո՞ւմ համար է կառուցվում. «Օղակաձև զբոսայգին քանդեցին, ժողովրդին զրկեցին Գլխավոր պողոտայից, հիմա էլ հերթը Կասկադինն է: Կասկադի աջակողմյան հատվածում նախատեսվում է բազմաֆունկցիոնալ համալիր կառուցել, մտածե՞լ են` տրանսպորտային հարցերը ոնց են լուծելու: Ընդ որում, եթե նախատեսում են 5 տարվա ընթացքում և´նախագծումն իրականացնել, և´ շինարարությունը, լուրջ չէ»:
Մանրամասները`տեսանյութում:
Աննա Բաբաջանյան
