09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Թրամփը հայտարարել է, որ Ռուսաստանն Ուկրաինայի հետ հակամարտության «բոլոր հաղթաթղթերն» ունի
Քաղաքականություն
07.03.2025 | 22:30
ԱՄՆ նախագահ Դոնալդ Թրամփը հայտարարել է, թե կարծում է, որ Ռուսաստանի և Ուկրաինայի միջև հակամարտության վերջնական կարգավորմանը հասնելու համար իր համար ավելի հեշտ կլինի գործ ունենալ Մոսկվայի, քան Կիևի հետ՝ նշելով, որ Ռուսաստանի նախագահ Վլադիմիր Պուտինն ունի «բոլոր հաղթաթղթերը», փոխանցում է CNN-ը։
Թրամփն ասել է, որ Պուտինի փոխարեն «ցանկացած մարդ» ռմբակոծելու էր Ուկրաինան՝ հաշվի առնելով ռազմի դաշտում առկա իրավիճակը: Եվ չնայած Թրամփն ասել է, որ ցանկանում է օգնել Ուկրաինային, նա ասել է, որ Կիևը պետք է աշխատի խաղաղության համաձայնագրի վրա:
«Կարծում եմ, որ մենք շատ լավ հարաբերություններ ունենք Ռուսաստանի հետ, բայց հենց հիմա նրանք ռմբակոծելով քարուքանդ են անում Ուկրաինան։ Ինչ վերաբերում է Ուկրաինային, ապա, անկեղծ ասած, ինձ համար ավելի դժվար է դառնում Ուկրաինայի հետ գործ ունենալը, և նրանք հաղթաթղթեր չունեն», – ասել է Թրամփը օվալաձև կաբինետում։
«Վերջնական կարգավորման հասնելու տեսանկյունից, հնարավոր է, ավելի հեշտ լինի գործ ունենալ Ռուսաստանի հետ, ինչը զարմանալի է, քանի որ նրանք ունեն բոլոր հաղթաթղթերը»,- շարունակել է նա:
Ավելի վաղ Թրամփը սպառնացել էր Ռուսաստանի դեմ նոր պատժամիջոցներով, քանի որ լայնածավալ հարվածներ է հասցնում Ուկրաինային:
«Ես իրականում կարծում եմ, որ նա անում է այն, ինչ կաներ ցանկացած այլ մարդ»,- ասել է Թրամփը` նշելով, որ իր կարծիքով, Պուտինը ցանկանում է դադարեցնել և կարգավորել այն:
