17.12.2025 | 23:30
ՌԴ-ն երկրորդ անգամ է հայտարարել Կուպյանսկի նկատմամբ վերահսկողության մասին
Գրավոր հրաժարվել եմ բժշկական միջամտությունից և վերադարձել Ազատության հրապարակ. Թանդիլյանը շարունակում է հացադուլը
Քաղաքականություն
05.03.2025 | 20:53
«Ապրելու երկիր» կուսակցության համահիմնադիր Մանե Թանդիլյանը հայտարարել է, որ գրավոր հրաժարվել է բժշկական միջամտությունից և վերադարձել Ազատության հրապարակ՝ շարունակելու հացադուլը։
«Նախ, ուզում եմ շնորհակալություն հայտնել բազմաթիվ զանգերի, նամակների համար, անհանգստանալով իմ առողջության համար։
Տեղեկացնեմ, որ այսօր առավոտյան ինքնազգացողությունս կտրուկ վատացել է և տեղափոխվել եմ հիվանդանոց։ Բժիշկները հորդորել են դադարեցնել հացադուլը և իրականացնել համապատասխան բուժում։
Գոհունակությունս հայտնելով Թիվ 1 համալսարանական հիվանդանոցի անձնակազմին՝ գրավոր հրաժարվել եմ բժշկական միջամտությունից և վերադարձել Ազատության հրապարակ։
Իմ և մեր ընկերների խնդրանքը շարունակում է մնալ նույնը՝ ուղղված Ռուբեն Վարդանյանին դադարեցնելու հացադուլը։
Նաև շնորհակալություն եմ հայտնում ԶԼՄ-ներին՝ Ռուբեն Վարդանյանի և մեր մյուս հայրենակիցների թեման անընդհատ բարձրաձայնելու համար։ Հուսով եմ ըմբռնումով են մոտենում այն լրագրողները, ում հետ այս օրերին չի ստացվել զրուցել։ Վաղը օրվա ընթացքում պատրաստ կլինեմ հանդիպել և զրուցել լրագրողների հետ»,- ասված է գրառման մեջ։
Հիշեցնենք, որ մարտի 1-ից հացադուլ հայտարարած «Ապրելու երկիր» կուսակցության համահիմնադիր Մանե Թանդիլյանի ինքնազգացողությունն այսօր առավոտյան կրկին վատացել էր, նրան շտապօգնության մեքենայով տեղափոխել էին հիվանդանոց:
Նշենք, որ Մանե Թանդիլյանը հացադուլ է հայտարարել` խնդրելով Բաքվի բանտում գտնվող Ռուբեն Վարդանյանին դադարեցնել հացադուլը: Մեսրոպ Առաքելյանը երեկ Factor TV-ի հետ զրույցում նշել էր, որ Թանդիլյանը հացադուլը կդադարեցնի այն դեպքում, երբ Ռուբեն Վարդանյանը դադարեցնի այն:
