20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Ադրբեջանում տեղի է ունեցել ՀՀ-ի հետ սահմանին ադրբեջանական զորքերի մասին տեղեկություններ հրապարակած ռազմական փորձագետի գործով դատական նիստը
Քաղաքականություն
05.03.2025 | 20:55
Ադրբեջանում այսօր տեղի է ունեցել պետական գաղտնիք կազմող տեղեկություններ հրապարակելու մեջ մեղադրվող ռազմական փորձագետ Ադալաթ Վերդիևի քրեական գործով նախնական դատական նիստը: Ադրբեջանական լրատվամիջոցների հաղորդմամբ՝ Նասիմի շրջանային դատարանում, դատավոր Բաբեկ Պանախովի նախագահությամբ, որոշվել է նիստն անցկացնել փակ ձևաչափով։
Որպես պատճառը նշվել է քրեական գործում պետական գաղտնիք կազմող տեղեկատվության առկայությունը։ Առաջին դատական նիստը նշանակվել է մարտի 19-ին։
Վերդիևը ձերբակալվել էր անցյալ տարի նոյեմբերին։ Ադրբեջանի Գլխավոր դատախազությունը հայտնել էր, որ 2024 թվականի նոյեմբերի 22-ին Առողջապահության նախարարության «Հանրային առողջության և բարեփոխումների կենտրոնի» քաղաքացիական պաշտպանության շտաբի պետ, Ադրբեջանի զինված ուժերում որպես սպա ծառայած ռազմական փորձագետ Ադալյաթ Վերդիևը լուրջ վնաս է հասցրել երկրի պետական անվտանգությունն ու պաշտպանունակությունն ապահովող շահերին։
Հաղորդվել էր, որ նոյեմբերի 22-ին «ազատագրված տարածքներ» կատարած մեդիա շրջագայության ժամանակ (այց էր կազմակերպվել Տավուշի մարզում ՀՀ-ի հետ սահմանազատված տարածքներ) Վերդիևը նկարահանել և սոցցանցերի իր օգտահաշիվներում հրապարակել էր տեղեկություններ և պատկերներ ադրբեջանական զինուժի մարտական դիրքերի մասին սահմանապահ զորքերի բարձունքներում, տեղակայումներում, կոորդինատներում և մարտական պայմաններում՝ դրանով իսկ առաջացնելով պետական անվտանգության և պաշտպանունակության շահերին հասցված էական վնաս:
Նրան մեղադրանք է առաջադրվել քրեական օրենսգրքի 284.1 (պետական գաղտնիքի տարածում) և 308.2 (պաշտոնեական լիազորությունների չարաշահում, որն առաջացրել է ծանր հետևանքներ) հոդվածներով:
Թարգմանությունը՝ Էմմա Չոբանյանի
