Քաղաքականություն
25.02.2025 | 22:45
Թուրքիայի նախագահ Ռեջեփ Թայիփ Էրդողանը հայտարարել է, որ միայն Թուրքիան կարող է փրկել Եվրամիությունը «փակուղուց, որի մեջ այն հայտնվել է»՝ կապված այնպիսի խնդիրների հետ, ինչպիսիք են տնտեսությունը և պաշտպանությունը, գրում է Turkiye Today-ը։
«Թուրքիան և նրա լիիրավ անդամակցությունը ԵՄ-ին կարող են փրկել Միությանը փակուղուց՝ սկսած տնտեսությունից մինչև պաշտպանություն և միջազգային դիրք»,- ասել է Էրդողանը։
Նա նշել է, թե Թուրքիան կարող է փրկօղակ լինել ԵՄ-ի արագ ծերացող տնտեսության և աշխատուժի համար։
«Որքան շուտ ԵՄ-ն առերեսվի այս իրողությունների հետ, այնքան լավ կլինի նրանց համար: Մենք պատրաստ ենք առաջ մղել մեր անդամակցության գործընթացը՝ հիմնված փոխշահավետության և հարգանքի վրա՝ կառուցողական մոտեցմամբ»,- ասել է Թուրքիայի նախագահը՝ ընդգծելով, որ անհրաժեշտ կամքի դեպքում կարճ ժամանակում կարելի է հասնել արդյունքների, և որ դրա համար Եվրամիությունը և այն ղեկավարող երկրները «չպետք է շարունակեն պնդել սխալների հարցում»։
Էրդողանը նաև նշել է, որ լիբերալ ժողովրդավարությունը՝ անցյալ դարի «ամենագայթակղիչ գաղափարախոսությունը», կանգնած է լուրջ ճգնաժամի առաջ, և դատարկությունը լրացվում է «ծայրահեղ աջ դեմագոգների» կողմից՝ նկատի ունենալով Եվրոպայում ծայրահեղ աջերի վերջին հաղթանակներն ընտրություններում:
«Թուրքիան մեծ նշանակություն է տալիս Եվրոպայում ապրող թուրք քաղաքացիների խաղաղությանը և բարեկեցությանը», – ասել է Էրդողանը՝ հավելելով, որ Անկարան «ուշադրությամբ հետևում է» զարգացումներին, որպեսզի համոզվի, որ ծայրահեղ աջերը վտանգ չեն ներկայացնում նրանց և այլ մահմեդականների համար:
Թարգմանությունը՝ Էմմա Չոբանյանի
