19.12.2025 | 15:58
Մինչև տարեվերջ նախատեսվում է ապամոնտաժել Սևանա լճի ափամերձ տարածքներում տարբեր անձանց պատկանող 10 կառույց
Պուտինը Սի Ցզինպինին տեղեկացրել է ՌԴ-ԱՄՆ վերջին հանդիպման մասին
Քաղաքականություն
24.02.2025 | 18:19
ՌԴ նախագահ Վլադիմիր Պուտինը Չինաստանի նախագահ Սի Ցզինպինի հետ հեռախոսազրույցում տեղեկացրել է ռուս-ամերիկյան վերջին շփումների մասին, հայտնում է Կրեմլի մամուլի ծառայությունը։
Նշվում է, որ Վլադիմիր Պուտինի և ՉԺՀ նախագահ Սի Ցզինպինի երկարատև հեռախոսազրույցի ընթացքում մտքերի խորը փոխանակում է տեղի ունեցել Ռուսաստանի և Չինաստանի միջև համապարփակ գործընկերության և ռազմավարական փոխգործակցության հետագա զարգացման արդի հարցերի շուրջ։ Քննարկվել են տնտեսության և առևտրի, ներդրումների, մշակույթի, կրթության և սպորտի ոլորտներում փոխշահավետ համագործակցության ընդլայնման ուղիները։
Հաստատվել է նաև «Մոսկվայում Հայրենական մեծ պատերազմում հաղթանակի 80-ամյակի տոնակատարության, Շանհայի համագործակցության կազմակերպության առաջիկա գագաթնաժողովի և Պեկինում Ճապոնիայի դեմ տարած հաղթանակի և Երկրորդ համաշխարհային պատերազմի ավարտի 80-ամյակի տոնակատարությունների կապակցությամբ բարձր մակարդակի հանդիպումների ժամանակացույցը»։
«Վլադիմիր Պուտինը Չինաստանի նախագահին տեղեկացրել է ռուս-ամերիկյան վերջին շփումների մասին։ Չինական կողմը աջակցություն է հայտնել Ռուսաստանի և ԱՄՆ-ի միջև սկսված երկխոսությանը, ինչպես նաև պատրաստակամություն է հայտնել աջակցել ուկրաինական հակամարտությունը խաղաղ ճանապարհով լուծելու ուղիներ գտնելուն»,- ասվում է հաղորդագրության մեջ։
Երկու երկրների ղեկավարներն ընդգծել են նաև, որ ռուս-չինական արտաքին քաղաքական կապերը կարևոր կայունացնող գործոն են համաշխարհային գործերում։ Նշվում է, որ դրանք բնույթով ռազմավարական են, ենթակա չեն արտաքին ազդեցության և ուղղված չեն որևէ մեկի դեմ։
Թարգմանությունը՝ Էմմա Չոբանյանի
