ՆԳՆ-ն կհստակեցնի զենքով պարգևատրման գործընթացը․օրինագիծը դրվել է շրջանառության

ՀՀ ՆԳՆ-ն Իրավական ակտերի գրանցման միասնական կայքում շրջանառության մեջ է դրել «Զենքի շրջանառության կարգավորման մասին» օրենքում փոփոխություններ և լրացում կատարելու մասին» ՀՀ օրենքի նախագիծը։

ՆԳՆ-ն այս նախագծով նպատակ ունի ապահովել հանրային անվտանգության կանխատեսելի՝ առավել բարձր մակարդակ, զենքով պարգևատրման գործընթացը դարձնել առավել օբյեկտիվ և որոշակիացված, բացառել զենքով պարգևատրման անկանխատեսելի և երկակի իրավական մոտեցումները, ինչպես նաև հստակեցնել պարգևատրական զենքերի կարգավիճակը։

Ըստ այդմ՝ պարգևատրական մեկ միավոր զենքը կարող է շարունակել մնալ անձի օրինական տիրապետման տակ, եթե նա հանդիսանում է Հայաստանի Հանրապետության քաղաքացի և ունի Հայաստանի Հանրապետության պետական ռազմականացված կազմակերպություններում 20 և ավելի տարի ծառայության ստաժ և առնվազն «մայոր» կոչում կամ դրան հավասարեցված դասային աստիճան։

Եթե նշված նախապայմաններին բավարարող անձը զենքով պարգևատրվել է մեկից ավելի անգամ, ապա երկրորդ և հաջորդ միավոր պարգևատրական զենքերը պետք է հանձնի ոստիկանություն՝ մինչև 2025 թվականի հուլիսի 1-ը։ Դիցուք, եթե, օրինակ, ԶՈՒ ԳՇ նախկին պետը մի քանի անգամ պարգևատրվել է զենքով, անգամ միջազգային գործընկերների կողմից, ապա պարտավոր է այդ պարգևատրված զենքը հանձնել, թեև ունի համապատասխան բոլոր օրինական ձեւակերպումները։

ՆԳՆ-ի այս նախագիծը հանրային քննարկման է դրվել փետրվարի 21-ին, նախագծին կողմ է քվեարկել 7, դեմ 93 տոկոսը։

Ըստ իրավապահ կառույցի՝ առաջարկվող կարգավորումները թույլ կտան զենքով պարգևատրման գործընթացը դարձնել առավել արժանիքահեն և որոշակիացված։ Փոփոխությունները դրական իմաստով, ՆԳՆ-ի հիմնավորմամբ, կանդրադառնան նաև հանրապետության քրեածին իրավիճակի վրա՝ հրազենով կատարվող հանցագործությունների արդյունավետ կանխարգելման համատեքստում։