05.05.2025 | 23:29
Թուրքիայի գլխավոր ընդդիմադիր կուսակցության ղեկավարը հարձակման է ենթարկվել. հարձակվողը ձերբակալվել է
Գերմանիայի համապետական ընտրություններում ռուսամետ դիրքորոշում ունեցող ծայրահեղ աջերը երկրորդ հորիզոնականում են․ սա շոկային ալիք է Եվրոպայում․ Politico
Քաղաքականություն
24.02.2025 | 17:51
Ֆրիդրիխ Մերցի պահպանողական դաշինքը հաղթեց Գերմանիայի ազգային խորհրդարանական ընտրություններում, իսկ ծայրահեղ աջերը գրանցեցին ընտրություններին իրենց մասնակցության պատմության ամենաբարձր ցուցանիշը։ Մինչև արդյունքները վերջնական տեսքի կբերվեն, պահպանողականները, որոնք բաղկացած են Մերցի Քրիստոնեա-դեմոկրատական միությունից (CDU) և նրա քույր կուսակցությունից՝ Քրիստոնեա-սոցիալական միությունից (CSU), շատ առաջ են անցել բոլոր մյուս կուսակցություններից՝ կանխատեսվող 28,5 տոկոսով, գրում է Politico-ն:
Մերցը, որը Գերմանիայի հաջորդ կանցլերը կլինի, եթե կարողանա համաձայնություն ձեռք բերել այլ կուսակցությունների հետ կոալիցիայի վերաբերյալ, կոչ է արել շուտափույթ կառավարություն ձևավորել, ամենաուշը՝ Զատիկին:
«Աշխարհը մեզ չի սպասի, չի սպասի կոալիցիոն երկար խոսակցությունների և բանակցությունների։ Այժմ մենք պետք է արագ վերականգնենք գործելու մեր կարողությունը, որպեսզի կարողանանք ճիշտ քայլեր կատարել տանը, որպեսզի ևս մեկ անգամ ներկա լինենք Եվրոպայում, որպեսզի աշխարհը տեսնի, որ Գերմանիան կրկին հուսալիորեն կառավարվում է»,- ասել է Մերցը Գերմանիայի մայրաքաղաքում կուսակցության կողմնակիցների հետ հանդիպմանը։
Մինչ այդ, կիրակի կայացած քվեարկությունը ցույց տվեց, որ ծայրահեղ աջ «Այլընտրանք Գերմանիայի համար» (AfD) կուսակցությունը, որն ուժեղ հակամիգրացիոն և ռուսամետ դիրքորոշումներ ունի, կանխատեսվում է, որ երկրորդ տեղում կլինի՝ 20,7 տոկոսով: Սա այս կուսակցության լավագույն արդյունքը կլինի Եվրոպայի ամենահզոր երկրում համապետական ընտրություններում, որոնք շոկային ալիքներ են ուղարկել ամբողջ մայրցամաքում:
AfD-ի պատմական երկրորդ տեղը գրավելը, ըստ կանխատեսումների, գրեթե կրկնապատկում է 2021 թվականի իր արդյունքը: Կուսակցությունը պատրաստվում է դառնալ խորհրդարանում ամենամեծ ընդդիմադիր ուժը, քանի որ բոլոր հիմնական կուսակցությունները բացառել են նրա հետ կոալիցիա մտնելը:
«Այս անգամ ընտրությունների արդյունքները վատն են, այդ պատճառով ես նույնպես պատասխանատու եմ ընտրությունների այս արդյունքի համար։ Այն փաստը, որ ծայրահեղ աջակողմյան կուսակցությունը, ինչպիսին AfD-ն է, այս երկրում ընտրությունների նման արդյունքներ է ստանում, երբեք չպետք է ընդունենք»,- հայտարարել է Գերմանիայի հեռացող կանցլեր Օլաֆ Շոլցը:
Թարգմանությունը՝ Տաթև Ֆռանգյանի
