Քաղաքականություն
24.02.2025 | 11:44
ԱՄՆ Միջազգային զարգացման գործակալության (USAID) նոր ղեկավարությունն էլեկտրոնային փոստի միջոցով աշխատանքից ազատել է 2000 աշխատակցի: Ամբողջ աշխարհում դիվանագիտական ծառայության և հարակից գերատեսչությունների շուրջ 1000 աշխատակիցներ ուղարկվել են վճարովի արձակուրդի։ Փետրվարի 23-ի գիշերը USAID-ի աշխատակիցներին ուղարկված նամակների պատճենները հայտնվել են The New York Times-ի տրամադրության տակ։
Բացառություն են կազմել «կրիտիկական կարևոր ծրագրերում» ներգրավված աշխատակիցները, ինչպես նաև հիմնական ղեկավարներն ու հատուկ նախագծեր մշակողները: Զանգվածային աշխատանքից ազատումներն իրականացվել են «անձնակազմի կրճատման» մեխանիզմի շրջանակում և ԱՄՆ օտարերկրյա օգնությունն ամբողջությամբ սառեցնելու՝ նախագահ Դոնալդ Թրամփի նախաձեռնության մաս են կազմում։
Անցյալ շաբաթ USAID-ն աշխատանքից ազատել է ևս 400 աշխատակիցների, ովքեր աշխատում էին շտապ մարդասիրական օգնություն տրամադրելու ուղղությամբ: Ավելի վաղ հաղորդվում էր, որ 90-օրյա ստուգումից հետո նախագիծը կկարողանա վերսկսել աշխատանքը։ Սակայն USAID-ի ներկայացուցիչներից այս հարցի վերաբերյալ նոր տեղեկատվություն չի ստացվել։
Հիշեցնենք, որ նախագահական երկրորդ ժամկետի մեկնարկից հետո Դոնալդ Թրամփը միլիարդատեր Իլոն Մասկի հետ համատեղ սկսել է USAID-ի լուծարման ծրագիր՝ այն անվանելով հանցավոր կազմակերպություն։ Արդյունքում դեմոկրատները հայցեր են ներկայացրել ԱՄՆ նախագահի և նրա նշանակած անձանց դեմ USAID-ում:
Գործակալությունը ներկայում ղեկավարում է ԱՄՆ պետքարտուղար Մարկո Ռուբիոն։
Թարգմանությունը՝ Տաթև Ֆռանգյանի
