26.04.2025 | 19:11
Գոռ Շատվերյանը՝ սամբոյի Եվրոպայի առաջնության չեմպիոն
Արաբական Միացյալ Էմիրություններն ու ԵԱՏՄ-ն ազատ առևտրի գոտի կստեղծեն
Տնտեսություն
22.02.2025 | 11:33
Արաբական Միացյալ Էմիրությունները (ԱՄԷ) և Եվրասիական տնտեսական միությունը (ԵԱՏՄ) երկու-երեք ամսից համաձայնագիր կստորագրեն ազատ առևտրի գոտի ստեղծելու մասին։ Այս մասին հայտարարել է ԱՄԷ արտաքին առեւտրի պետնախարար Թանի բեն Ահմեդ Ալ Զեյուդին․ գրում է ՏԱՍՍ-ը։
«Անցյալ տարի կարևոր իրադարձություն էր ԱՄԷ-ի և Եվրասիական տնտեսական միության միջև ազատ առևտրի համաձայնագրի նախապատրաստումը, որի անդամ է Ռուսաստանը: Այս համաձայնագրի վրա աշխատանքը տևեց գրեթե մեկուկես տարի: Մենք անհամբեր սպասում ենք փաստաթղթի ստորագրմանը երկու-երեք ամսից»,- ասել է նա Աբու Դաբիում Ռուսաստանի արտահանման կենտրոնի կողմից կազմակերպված Made in Russia տոնավաճառի բացմանը:
Պետնախարարը նաև նշել է, որ վերջին երեք տարիների ընթացքում ԱՄԷ-ի և Ռուսաստանի միջև առևտրաշրջանառությունը 3,5 միլիարդ դոլարից հասել է 10 միլիարդ դոլարի։
ԱՄԷ-ի և ԵԱՏՄ-ի միջև ազատ առևտրի գոտու շուրջ բանակցությունները սկսվել են 2023 թվականի մարտին։ Այս ընթացքում կողմերը խորհրդակցությունների մի քանի փուլ են անցկացրել։ Ինչպես հայտնում է ՌԴ տնտեսական զարգացման նախարարությունը, փաստաթուղթը, ի թիվս այլ հարցերի, կկարգավորի սակագների ազատականացման, մաքսային և արդյունաբերական համագործակցության, էլեկտրոնային առևտրի և մտավոր սեփականության, առևտրի պաշտպանության միջոցառումները։
Ավելի վաղ Եվրասիական տնտեսական հանձնաժողովի առևտրի նախարար Անդրեյ Սլեպնևը հայտարարել էր, որ ԱՄԷ-ի և ԵԱՏՄ-ի միջև համաձայնագրի պատրաստման շուրջ բանակցություններն ավարտվել են։ Ռուսաստանի Դաշնության առաջին փոխվարչապետ Դենիս Մանտուրովի խոսքով՝ այս փաստաթուղթը կարող է ստորագրվել 2025 թվականի կեսերին։
ԵԱՏՄ-ն միջազգային ինտեգրացիոն տնտեսական միություն է, որի մասնակիցներն են Ռուսաստանը, Հայաստանը, Բելառուսը, Ղազախստանը և Ղրղզստանը։ Դիտորդի կարգավիճակ է տրվել Իրանին, Կուբային, Մոլդովային և Ուզբեկստանին։
