18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
ՌԴ-ն հայտարարել է Կուրսկի շրջանի 64%-ն իր վերահսկողությանը վերադարձնելու մասին
Քաղաքականություն
20.02.2025 | 13:00
Ռուսաստանի զինված ուժերը վերականգնել են վերահսկողությունը Ուկրաինայի զինվորականների կողմից օկուպացված Կուրսկի շրջանի մոտ 64%-ի նկատմամբ։ Նման հայտարարությամբ է հանդես եկել ՌԴ ԶՈւ ԳՇ գլխավոր օպերատիվ տնօրինության պետ Սերգեյ Ռուդսկոյը երկրի ռազմական գերատեսչության «Կրասնայա Զվեզդա» թերթին տված հարցազրույցում, գրում է DW-ի ռուսական ծառայությունը։
«Ուկրաինայի զինված ուժերի վերահսկողության տակ գտնվող Կուրսկի շրջանի տարածքը կրճատվել է ավելի քան կեսով, ազատագրվել է ավելի քան 800 քառակուսի կիլոմետր, ինչը կազմում է հակառակորդի կողմից ի սկզբանե օկուպացված տարածքի մոտ 64 տոկոսը (1268 քառ.կմ)»,- վստահեցրել է նա։
Ռուդսկոյի պնդմամբ՝ ռուսական զորքերը ներկայում առաջխաղացում են գրանցում Կուրսկի շրջանում բոլոր ուղղություններով, իսկ Ուկրաինայի զինված ուժերը «ծանր կորուստներ են կրում և նահանջում իրենց դիրքերից»։
Ի թիվս այլ բաների՝ ռուս գեներալը մեջբերել է Ռուսաստանի հաշվարկները՝ կապված 2024 թվականի պատերազմում Ուկրաինայի կորուստների հետ՝ «590 հազար զինվոր սպանվել և վիրավորվել է»։
Նշենք, որ փետրվարի 4-ին Ուկրաինայի նախագահ Վլադիմիր Զելենսկին բրիտանացի լրագրող Պիրս Մորգանին տված հարցազրույցում ասել էր, որ Ռուսաստանի դեմ պաշտպանական պատերազմում իր երկրի կորուստները կազմել են 45,100 զինծառայող։ Բացի այդ, գրանցվել է 390 հազար վիրավոր, նշել է Ուկրաինայի ղեկավարը։
Ինչ վերաբերում է ռուսական կորուստներին, ապա, ըստ Զելենսկիի, Ուկրաինա ներխուժման ժամանակ սպանվել է մոտ 350 հազար ռուսաստանցի, ևս 600-700 հազարը վիրավորվել է։
Թարգմանությունը՝ Տաթև Ֆռանգյանի
