20.02.2026 | 13:44
NYMEX․ Ոսկու գինը նվազել է 0.21%-ով և կազմել 4975.90 դոլար
Ինչո՞ւ հրավիրել նրանց․ Լավրովը՝ Ուկրաինայի պատերազմի հարցով բանակցություններին Եվրոպայի մասնակցության մասին
Քաղաքականություն
17.02.2025 | 18:38
Ռուսաստանի և ԱՄՆ-ի ներկայացուցիչներն Էր Ռիադում կայացած հանդիպման արդյունքները փոխանցելու են երկու երկրների նախագահներին, ապա Վլադիմիր Պուտինն ու Դոնալդ Թրամփը կորոշեն հետագա քայլերը։ Այս մասին հայտարարել է ՌԴ ԱԳ նախարար Սերգեյ Լավրովը, գրում է Meduza-ն։
Խոսելով առաջիկա բանակցություններից ակնկալիքների մասին՝ Լավրովն ասել է, որ առաջին հերթին կցանկանար լսել ԱՄՆ ներկայացուցիչներին։
«Երբ մենք գնում ենք բանակցությունների մեր գործընկերների առաջարկով, առաջին հերթին ցանկանում ենք լսել նրանց։ Դրա համար մենք կլսենք մեր ամերիկացի զրուցակիցներին և, իհարկե, պատրաստ կլինենք պատասխանել»,- ասել է նա։
Ռուս-ուկրաինական պատերազմի ավարտի բանակցություններում եվրոպական երկրների հնարավոր մասնակցության մասին հարցին ի պատասխան՝ Լավրովն ասել է, որ չգիտի, թե Եվրոպան ինչո՞ւ պետք է մասնակցի բանակցություններին։ Նա հիշեցրել է մինսկյան պայմանավորվածությունները և Գերմանիայի նախկին կանցլեր Անգելա Մերկելի հայտարարությունն այդ համաձայնագրերի նպատակների մասին։
«Այժմ նույն Մյունխենի համաժողովում կոչեր հնչեցին, մասնավորապես, Ֆինլանդիայի նախագահի կողմից։ Ալեքսանդր Ստուբն ասել է, որ անհրաժեշտ է նախևառաջ հրադադար կնքել և այն օգտագործել Ուկրաինայի ռազմական հզորացման համար։ Այսինքն՝ եվրոպացիների այդ փիլիսոփայությունը որևէ տեղ չի անհետացել, այնպես որ, ես չգիտեմ, թե ինչ պետք է անեն բանակցությունների սեղանի շուրջ: Եթե նրանք սկսեն առաջ մղել հակամարտությունը սառեցնելու մասին ինչ-որ խորամանկ գաղափարներ, իսկ եթե իրենք, սովորության համաձայն, նկատի կունենան պատերազմի շարունակությունը, ապա ինչո՞ւ հրավիրել նրանց այնտեղ»,- ասել է ՌԴ ԱԳ նախարարը։
Ավելի վաղ Ուկրաինայի և Ռուսաստանի հարցերով ԱՄՆ նախագահի հատուկ բանագնաց Քիթ Քելլոգը հայտարարել էր, որ եվրոպական երկրներին չի տեսնում Ուկրաինայի հարցով խաղաղ բանակցությունների մասնակից։ Նրա խոսքով՝ Վաշինգտոնը չի ցանկանում «խոշոր խմբային քննարկման մեջ մտնել» և «կրկնել Մինսկը»։
Հիշեցնենք, որ փետրվարի 18-ին Սաուդյան Արաբիայում տեղի կունենա ՌԴ-ի ու ԱՄՆ ներկայացուցիչների հանդիպումը։
Թարգմանությունը՝ Էմմա Չոբանյանի
